「電療期間，有段日子好陰天又好凍好凍。有日我電療完，坐巴士返藍田（公屋寓所），天色灰濛濛，我一閉目養神，個腦就有好多聲音，好似箭咁一支支射埋嚟：『不如你自殺啦！』我好痛苦！

「我住廿一樓。做完割脷手術之後，每次我一經過走廊欄杆，都會望一望：呢度跳落去，有人行，跳落去可能會砸到人……呢邊冇乜人行，如果我跳，我要着埋鞋跳，咁着乜嘢衫呢？要夜晚跳！唔好畀人見到我嘅衰樣……」

洪朝豐去年十月確診患上舌癌，且左邊近牙牀位置出現癌前病變徵狀。十二月十一日進行了割除腫瘤手術後，容貌變了，口齒變得不清了，加上之後接受電療帶來的副作用，令他寢食難安，心情直插谷底，多次有尋死念頭，甚至走到生死邊緣。

結果，今天他坐在敝公司的影樓裏，無論語氣如何抑揚頓挫，無論把那些痛苦的情景和內心掙扎，描述得如何巨細無遺，但總是猶如在說着別人的故事。

他說，正月年初六，是他的「重生日」。「嗰日有個學生提醒咗我：『點解唔將啲美好嘅感覺供畀佛陀呢？』嗰晚，我瞓得好酣，半夜我起身去廁所，幡然覺悟：我已經唔係以前嘅洪朝豐！電療完之後，我要盡快開始番正常嘅生活！之後我每日個人好輕盈，成日開心到忍唔住笑！哈哈哈！」

所以，他今天特別為拍這輯訪問照片，戴了一隻鑲着桃紅色石榴石的戒指。「石榴石，Garnet，係一月份嘅生日石，我係一月五號生日嘅。呢隻戒指，就係代表我終於成為咗一隻『火鳳凰』！」

 

好核突

因為舌癌，洪朝豐去年十二月十一日，在聯合醫院進行了二十小時的割除腫瘤手術。「主要係割左邊嘅脷，同埋因為近牙牀嘅位置有條黃色嘅膿，所以要削埋牙牀骨，睇吓有冇受感染。」結果發現四粒淋巴核有癌細胞。「切晒之後，佢哋喺我嘅面珠登，同左邊大腿內側攞咗啲組織，聯埋一齊，就用嚟補充番條脷，同冚番牙牀嘅位置。」

手術後，他留院十三日，期間每日只能吊七支營養奶來維生。「我原本都算係一個靚仔呀——至少我覺得，哈哈！但住院時我瘦咗十四磅，塊面好長、好唔對稱，左邊面同條脷都好腫，條頸同左邊腮位，留低咗好長嘅開刀痕！醫院空氣又乾，我爆晒拆，個樣好似整容整壞咗咁，好核突！」

他向來貪靚，所以當時的那個自己，他根本完全面對不來。「我好抗拒照鏡，亦都唔會影相。我屋企人曾經提議我由手術室出嚟之後，拍低做紀錄，『唔要呀！』我太醜樣！我唔要任何呢啲醜樣嘅嘢留低！」

出院後，他每次外出都盡力把自己這些「核突」的部位包到冚。「帽、頸套同口罩都係我出街時嘅三件護身寶物，我只畀對眼人睇到——好彩我對眼仍然係OK嘅。」

三月五日，已「重生」的他，到醫院接受最後一次電療，興奮得不停自拍。