假設，閣下有一個法律學士學位，你會選擇：
A. 人望高處，梗係考取執業律師資格！
B. 人冇夢想，同條鹹魚有咩分別？梗係追尋夢想！
一二年，當年廿三歲的J.Arie（雷深如）選擇了B。一三年，她更以「文青女神」形象出道，「娛樂圈嘅定律，係要將自己最靚嘅一面、最包裝嘅一面俾人睇，我都明嘅，但喺呢個包裝之下，我每一次出嚟，都唔係太自在。
「我唔明點解女Artist出嚟，就一定要靚靚，鬈頭髮、長頭髮⋯⋯咁當然，我唔係賣靚嘅路線啦！既然我唔係賣靚、賣玉女，咁點解我要扮斯文、扮矜持呢？」
衝擊中，她心裏有十萬個為甚麼，於是，一九年成為獨立歌手的她，決定一改形象，梳起她口中的「觀音頭」，穿上Hip-hop味十足的衣服，重新起步。
「我要有血有肉！呢七年我抑壓咗好耐，o依家我冇辦法再壓制我自己嘞，我想個人毫無保留囉，所以我會藉住我嘅音樂、訪問，去表達出嚟。」
逆風而行，從來不易。三十一歲的J.Arie，已找到屬於自己的方法，步過心靈寒冬，你呢？

 

新歌〈陰陽道具〉寫得露骨，她在MV中也作出大膽演出，跟維持了多年的「文青女神」形象迥異。

轉運

娛樂圈，90%或以上的女藝人，也會以最亮麗的姿態現身於人前，昔日的J.Arie也如是，畢業於港大法律系的她，出道時也走文青路線，但自去年七月起，她來了一個一百八十度的轉變。
通常啲人出親嚟，都一定要正能量呀！（七情上面）我唔可以唔開心、唔可以嬲！我都明嘅，我入行七年嗰陣，喺一個「文青女神」嘅包裝之下，次次出親嚟都攬住個琴、扮晒斯文，which is只係10%、20%嘅我囉！八成嘅我係癲o架！我做live，可以keep住喺hyper（亢奮）嘅狀態，所以我想出嚟都要有血有肉！
有咁嘅轉變，紮呢個「觀音頭」、着呢啲衫，係因為我好鍾意日本嘅Misia，無論係佢把聲定係image，都好有character，我呢個類似dreadlock嘅髮型，就係源於佢。o依家我呢個look，令呢一刻嘅我，先至真正自在啲。
外在的轉變，最容易令人察覺，J.Arie坦言，自己的內在，一直如是。
我o依家係「轉運」呀！係我自己create（創造）俾自己嘅運！之前啲人見我斯斯文文，好文青咁，其實我嘅內心係有好多好evil嘅諗法，甚至係為世不容、好唔道德嘅。但我覺得呢啲諗法，其實每一個人都會有，只係佢哋唔會講出嚟，因為驚俾人批鬥、俾人鬧。
我就藉住音樂，將呢啲諗法講出嚟，去年七月嘅〈雙面哈菲〉，係我嘅「精神病系列」嘅首部曲，就係講精神分裂嘅。最近嘅新歌〈陰陽道具〉，就係講性上癮嘅。
新歌了咗我多年嘅心願，我一直都想寫一首關於性嘅歌，呢樣嘢一直都係人嘅禁忌，冇人會公開談論性，又或者講完之後，尤其係女性講嘅話，都會俾人標籤做「性女」，俾人話「乜你咁淫蕩o架！」。我覺得，既然做獨立歌手，就要盡情玩，自己鍾意嘅、真實嘅，就做囉。

 

雖然她表示父母不太支持其歌唱事業，但在女兒力邀下，雷父雷母也「欣賞」了《陰陽道具》MV，期間兩老的負評不絕。