現年三十二歲的雨僑，跟細一年、亞視出身的歌手羅力威一直低調拍拖，因為初時一度遭經理人公司反對，幸七年後終於修成正果，並定於今年三月三十一日於淺水灣舉行婚禮。

結婚一生人一次，一對準新人正為婚事籌備得如火如荼。日前，他們已在香港影婚紗相；而向來斯斯文文的雨僑，為做個靚新娘，不惜真空上陣，穿上中門大開的超deep V桃紅色婚紗裙示人，一於來個婚前終極性感。

雨僑原來煮得一手好餸，她還指羅力威平日最愛吃她炮製的辣豉油雞翼和西洋菜湯。

雙喜臨門

雨僑跟羅力威的愛火，緣於七年前邀請他出任自己音樂會的嘉賓；而二人由公司反對，偷偷發展地下情，至近年戀情才慢慢浮面。去年，外貌cool爆的羅力威，表示已經求婚成功 ；可是，過程絕不浪漫 ，「我係喺屋企求婚，買咗隻戒指，冇花亦冇跪地，我嘅誠意就係睇我咁多年點做人。」而羅力威為紀念二人開花結果的愛情，自爆要做一隻驚天動地的情歌，「我哋相識係因為音樂，因為娛樂圈；同時，兩個都係樂壇中人，所以想做一隻我哋之間嘅經典。」

行動遠勝甜言蜜語，雨僑直言十分受落，「求婚係四、五年前，佢對我係好照顧同包容。其實，佢有好多感動位，好似我開設嘅舖頭，佢真係逐粒逐粒磁磚黐落去牆度，又幫我砌傢俬。佢嘅付出，真係時間同心機。」由於今年適逢是雨僑入行十年，加上又決定結婚，正好是雙重意義。

向來對婚禮有憧憬的雨僑，喜歡陽光下的草地，故選定三月底於淺水灣酒店，舉行一個大型的戶外婚禮，更會邀請二百多人到場，並由牧師證婚；而晚上則只會跟親友食飯。現時婚禮的細節和安排都由他倆自己負責，並未有搵wedding planner幫手。為學習夫妻相處之道，他們又報名上婚前輔導課，雨僑坦言︰「呢個對我哋建立家庭好有幫助，大家嘅性格係可以互補不足，好清楚佢真係我『對嘅人』。」

雨僑和拍拖七年的羅力威，將於今年三月結婚。日前，兩人在港拍婚紗照，準人妻雨僑更來個終極性感，以超deep V騷身材，幸好未婚夫冇詐型。

兩人愛得簡單，強調拍拖以來，最喜歡出外發掘美食；不過，他們卻笑言試過多次中伏。