高永文急CALL保育土樓

高永文醫生（下圖）是潮州人，對「架己冷」文化自然上心。兩周前他和潮汕文化協進會顧問許百堅、國際潮團總會常設秘書處執行秘書長林楓林一齊返潮州睇土樓古蹟，一睇就心痛，因為多年前探訪過的建築群，不少都因為日久失修而倒塌了。

高永文畀筆者睇佢在土樓拍嘅短片，見佢在有幾百年歷史的土樓穿梭，踏上脆弱木片梯上二樓三樓，「木材都有幾百年歷史，承托力不足隨時會斷，依家當地居民都不准人上二樓，我同百堅講，等我一個行上去無事，至好跟着上來。」

中國福建土樓已被列入《世界遺產名錄》，其實潮汕土樓也有大約七百座，散布在與閩西南接壤的潮州市饒平縣北部、潮安區鳳凰山區及其周邊地區，還有潮安區鐵鋪、官塘及古巷等城鎮。部分如道韻樓已被納入國家級保護文物，是全球最大型的八卦形土樓，極具文物價值。然而，潮汕土樓大部分位處交通不便位置，外界不易前往，所以就不如福建土樓般受到注目，加上政府撥款不足。高醫生話以目前倒塌情況，保育已是刻不容緩，否則這樣寶貴的文化遺產不日便會消失。

說起潮州文化，高永文話潮州不單止有建築、還有刺繡和陶瓷，「我阿媽就是潮繡傳承人，小時候聽佢講過，佢刺繡工藝是同鄉裏最好的，好多人跟佢學o架。」佢向來身體力行推廣潮州文化，又教潮州話又帶過年輕人回潮州參觀，只是做衞福局局長那幾年比較忙，如今佢笑話會瞓身搞文化保育戰。佢向市政府提咗保育案，希望外界多些關注潮州土樓，讓下一代也能知道祖先的歷史。