劉鳴煒教後生仔玩政治

青年發展委員會副主席劉鳴煒成立的MWYO最近有新搞作，設計了一套玩法類似大富翁、模擬香港政治形勢嘅Board Game《權謀風暴》。劉鳴煒親自落場，同筆者等幾個人試玩，感受一下咩叫政治中的爾虞我詐。
遊戲最多九個人玩，玩家先抽牌決定屬於建制、泛民、定係中間派角色，再抽只有自己至知的秘密目標牌，並以此左右整場遊戲中每個行動的決定；玩家需要利用工具卡，在不同事件中累積政治、民望、人脈、財力及親中五大指數的籌碼，以換取權位。過程中需協調、拉攏或攻擊、抹黑其他玩家，不時要挑撥離間，有時又要枱底交易，或者玩踢爆。鳴煒抽中做本土派，可是秘密目標卻要當上權傾朝野的局長，筆者抽到做泛民人士，秘密目標卻要當上全國人大，以此感受政治人物的複雜性，並非表面睇咁簡單。

劉鳴煒熱推Board Game《權謀風暴》，旁為設計遊戲的郭東旺。

期間發生咗件小插曲，就係有人派出「政府成立青年發展局，主理青年政策及青年發展事務，加入小組出謀獻策」的突發事件，要求各玩家爭取同盟、合縱連橫一番，以贏得權力籌碼。現實中身為青發會一員的他，竟然唱反調，仲笑話「搞乜鬼青年發展局啊？」看來他是太投入本土角色，逢政策必反。
遊戲設計者郭東旺話，Board Game其實係上年出版、一本叫《權力遊戲：香港青年從政秘笈》的延續，佢將書中概念轉化成遊戲吸引年輕人。其實政治一日都嫌長，設計期間最大困難就係揀咩政治事件做工具咭至唔會咁快OUT？筆者發現遊戲裏面有啲事件都幾貼市，例如中央「將《國安法》列入《基本法》附件三」、美國終止《香港關係法》，香港失去獨立關稅區地位、以及政府重新成立政治部等。郭東旺話，設計時除了會選擇社會熱議事件之外，有些是取自《權力遊戲》書中受訪者和身邊從政朋友的故事，例如參加國情班、籌辦民主集思會、到北大進修等，部分事件只係假設，想不到最終有些成真，佢都好意外。
鳴煒話，遊戲係想讓對政治有興趣嘅後生仔試吓政治課101，並透過換位思考了解唔同人士立場，體會政治背後其實好多協調、暗湧和角力，所有事件背後都有盤算。如果反應好，會考慮推出擴充包，更新一啲新嘅事件，保持熱度和新鮮感。我哋笑話「可能有人唔想青年人咁早接觸政治？」鳴煒就答：「你唔去接觸政治，政治都會接觸你。」
呢套遊戲十月中就會有得賣，有興趣玩政治嘅可以留意吓。