職場獵人

我第一份工係喺滙豐銀行做管理實習生，當時係四十幾年前，仲未有校園招聘會、網上招聘等渠道，係自己寫信去滙豐介紹自己。我係理科生，本來覺得銀行未必會請，所以唔打算報，但後來有一位理科同學「勇敢」嘗試而成功取錄，於是我本着一試嘅心態寫信求職，僥倖成功獲聘，從此踏入了金融界。

其實本科讀乜嘢同工作職位未必有直接關係，不過以前資訊比較封閉，亦冇人同剛畢業嘅學生做輔導，所以大家都係靠估。當時求職同請人都係靠招聘廣告或介紹，後來有所謂職業介紹所，求職者上到去會見到一張張紙介紹不同職位，睇啱邊份就埋去報名，好似o依家啲地產舖。最近認識咗一對年輕孖仔陳家安（Eddie）和陳家成（Jackson），同佢哋傾開偈至知，現今嘅人才委托招聘公司會跟住人才嘅事業路一齊成長，逐步建立人才庫和客戶網，唔係逐單計，介紹完就拜拜。

一對孖仔唔止樣貌相似，連興趣事業都一樣，畢業後就去咗一間跨國獵頭公司工作，直到2009年離開創業，建立KOS。當時係金融海嘯之後，好多銀行、保險集團都大幅裁員，我問佢哋點解會喺個市下行嘅時候創業。佢哋解釋，公司裁員或重組並非唔請人，而係要請有能力嘅高班人才，可以一個頂三個，咁公司至可以喺精簡架構之後仍然維持一個「好打得」嘅團隊。所以市場逆轉，至係人才招聘公司發揮所長嘅時候，以前累積嘅人才庫喺呢個時候就係最重要嘅競爭優勢。

兩位年輕人憑拚搏精神同銷售技巧，公司好快發展到有四、五位同事，但嗰陣佢哋好後生，所以講笑話見客都只係認自己係打工嘅，驚客人對年輕老闆冇信心。後生仔建立咗一個年輕、有衝勁嘅團隊，創業到今日已經八年，團隊有近三十人，喺本地創立嘅公司嚟講規模唔細。

不過，創業八年後佢哋開始覺得公司發展進入瓶頸階段，團隊全部係後生仔女，肯衝但管理較鬆，而且公司喺香港發展成熟，係時候要衝出香港。呢個時候，兩位年輕人施展本行功夫，出動說服能力同誠意，去獵了一位高人返嚟領導公司。呢位高人唔單止有跨國獵頭公司經驗，曾幫助公司建立亞洲團隊，仲喺四大審計公司工作多年，管理經驗同人脈網絡兼備。

而最令我佩服嘅係呢位高人原來係孖仔嘅師傅楊碩碩（Louisa）。初生之犢不畏虎，兩位年輕人夠膽從零開始並不奇怪，能夠有自省能力，知道自己不足而尋求有管理能力嘅人領導公司年輕團隊，呢點就好難能可貴。但係喺國際公司身居要職嘅Louisa點解會答應加盟？係徒弟說服能力強定係有其他誘因？公司一班後生仔會唔會驚咗空降而來嘅一姐？KOS要衝出香港，又有乜嘢條件同國際行爭？下星期再同大家講。