自四月中國政府接連推出措施壓抑樓價後，內地住宅成交逐漸萎縮，上月成交下跌達到八成，雖然好多地產商表面上仍然死撐，話乜嘢量跌價不跌，問題唔大，而且舊年賣樓成績好，今年有好多現金回籠，唔急於減價賣樓套現，樓價可以企穩。

事實係咪咁？一言夠膽講梗唔係，樓價呢兩三個月會唔會跌小弟唔敢講，但未來半年國內樓價跌硬就肯定冇錯，絕對唔會只係量跌價唔跌，量跌之後樓價必然調整，事關樓價係要靠成交去支持。

內地樓市上月成交呈大萎縮，圖為上海徐匯區。

一言跟國內發展商老友傾偈，佢哋話並非唔肯減價，而係唔敢減價。點解？大家有所不知，香港人買樓好重視合約精神，好少會輸打贏要，但國內就唔同，內地買家有個觀念，買樓後個價係唔會跌，倘若所買樓盤往後再推單位價格下調，買家隨時唔成交，甚至會衝擊地產商，○八年呢啲例子俯拾皆是。由於國家要強調和諧社會，若三天兩晚就有人跑去抗議瞓街，發展商好難交代。

咁點算好呢？發展商老友話畀一言聽，嗰啲開售咗嘅樓盤，寧願賣得慢啲，盡可能都唔減價，但仲未開賣嘅，到推售時定價就要保守，甚至跟原先心內所定價格要大幅劈下去，正所謂從未推售，就未有減價出現喇。

老友仲話，若然市場持續差落去，地產商今年資金鏈冇問題，但唔代表明年冇事，如果有部分發展商頂唔順減價，咁就大件事。當然，今日仲未睇到呢個情況，但都唔可以咁老定。

內房股價 未跌完

至於內房股價，自政策推出後，股價拾級而下，直至上周才有見底回升迹象，市場又即時亢奮，認為內房股已經跌夠，依家入市應該十拿九穩。

一言認為呢次內房股價標升，純粹係反彈居多。早前股價大幅下挫，主要係反映政策的影響，經過接連公布措施後，暫時再出重招機會較低，畢竟政策框架大體已定，政府要先畀時間觀察政策效能。

市場消化咗政策消息，股價逐漸站穩下來，但投資者唔好忘記，政策影響只係第一步，第二波就要睇銷售數據。喺政府打擊下，內房銷售已經脫腳，今年內房公司中期業績公布銷售數字時，都唔慌好到去邊，到時大家會察覺，年初所定嘅銷售目標將難以達到；倘若大地產商將全年目標大幅調低，咁就隨時觸發第二浪沽售潮。未來幾個月，內房股仍要面對另一項大風險，就係由政策打壓到實體衝擊。

買內房股嘅，就唔好諗住咁快到底，即使長遠看好大陸樓市，中短期仲有好大壓力，內房陰霾仍然未散；依一言看，最快都要等地產商九月公布數據，股價繼續調整後，先係中長線投資時機，今日就只係炒炒好喇。

內地樓成交大跌，銷售小姐一臉無奈。

代理高層擦鞋 鞠躬盡瘁

作為打工仔，除咗做嘢要得之外，點樣跟老闆相處其實十分重要，即使你搞掂日常工作，只係做咗職責嘅一半，其餘一半係點樣去應付老細，呢點隨時仲緊要過做嘢。

但點做先恰當，實在係一大學問，好多時啲人做得過晒火位。通天跟一言講咗個地產代理擦鞋故事，話說某間代理嘅主管會議，每次老細都會發表偉論，通常都係啲大路嘢，再唔係就罵啲下屬。

咁嘅會，啲人又點有興趣，之但係攞得份人工，點都要聽你噴口水。有次老細發表完洋洋灑灑嘅言論後，位高層即時出嚟做總結，講乜？大意係：「老細講嘢幾咁精采，肯定大家都冇瞓覺喇，如果你瞓覺，咁就係你嘅一大損失，因為老細塞緊啲錢落我哋個袋呀。」

地產代理搶客叻都唔夠，點同上司相處先重要。

張化橋 不亢不卑

高層對老細嘅歌功頌德，確實係鞠躬盡瘁，但就嫌過猶不及。對待老細之道，簡直係藝術，呢方面做得好嘅人唔多，而瑞銀董事總經理及亞洲房地產主管張化橋，就真係可以做到不亢不卑。

張化橋曾經係最佳分析員，見解頗為獨到，曾早悉先機，篤爆歐亞農業同格林柯爾（兩家已除牌的香港上市公司）做假。二○○六年佢去深控（0604）出任首席執行官，挾着佢個大名，深控股價即時飛升，之後佢為深控做咗唔少嘢，特別跟投資者關係，令基金對深控重新關注。

做咗兩年企業家，佢宣布又返去做投行。公布離去冇耐，深控舉行股東大會，之後循例接見傳媒，講講公司近況。由於佢名氣大，媒體只搶住問張化橋點解離去，對公司影響等等。

張化橋一一回應，但佢知道唔應該搶公司風頭，就跟媒體講：「大家，深控有良好制度同優質資產，有今日成就，並非單靠個人努力，我喺整間公司入面只係好渺小，今天係股東大會，並非我個嘅告別會，希望大家可以多點關注公司。」

呢番說話既唔爭功勞，又變相讚許公司，更加冇搶集團老總風頭，回應恰到好處，呢啲咪係得體囉。

張化橋不但分析獨到，待人接物更謙謙有禮。