貝安琪收身必殺技

中德混血模特兒貝安琪（Ankie），與未婚夫Simon所生嘅兒子Sebastin，轉眼間已經八個月大。除咗忙住湊仔外，練咗瑜伽十七年、擁有瑜伽導師牌照嘅佢，日前仲做埋星級導師，跟內衣品牌搞咗兩場瑜伽班，親自教授粉絲。

產後嘅Ankie，始終做開瑜伽，收身話咁易。當日，佢早已回復未生前嘅fit爆身材，一個人對住廿名學生，教得頭頭是道；佢仲全程落手落腳，見到有學生姿勢出錯，即刻上前協助糾正。上完堂，班粉絲仲好興奮咁捉住佢「集郵」。Ankie向東姑坦言︰「呢個活動對我都好有意義，因為難得可以同粉絲一齊做我最鍾意嘅瑜伽，又可以傾下偈聯誼，拉近大家嘅距離。」佢又透露現已轉投Mandy Lieu嘅模特兒公司旗下，閒時也會互相交流瑜伽及湊仔經。課堂後，身為人母嘅佢急急腳趕返家湊仔，今時今日梗係有仔萬事足喇！

日前，Ankie化身星級瑜伽導師，親自指導粉絲做瑜伽，更逐一協助佢哋完成高難度嘅動作。

 

Ankie對自己身形要求高，產後八星期已重拾瑜伽，難怪咁快就瘦身成功。

因為囝囝喜歡出街，Ankie不時兩母子四圍去，更帶佢去超級市場買餸，一來親子，二來畀佢認識新嘅事物。