看着自己的兒女一天一天健康地成長，相信是每個母親感到最窩心的事。

中德混血模特兒貝安琪（Ankie），今年二月在德國，為外籍未婚夫Simon van Damme誕下兒子Sebastian。作為新手媽媽的她，每天都進行她的B計劃，由兒子出世開始。每天堅持餵哺母乳，BB沖涼、換片，她亦絕不假手於人，非常享受湊B的樂趣。「自從做了媽媽後，我覺得自己的life﹙生命﹚變得更有meaning﹙意思﹚，每日的生活亦變得好充實和開心。」

貝安琪笑言不會做怪獸家長，「我唔會畀囝囝喺嬰孩時期學習太多嘢，希望佢健康快樂成長就OK。」

開刀生B

訪問這天，Ankie與其三個月大的兒子﹙Sebastian﹚一同到場，雖然當日天氣炎熱高達30度，但並沒有影響二人的拍攝心情，尤其是B仔，對住鏡頭相當敏感，眼仔碌碌，極之精靈。Ankie笑說：「佢好鍾意影相o架！每次我哋一攞起相機，佢就好自然咁望住鏡頭笑，唔知呢啲係唔係遺傳呢？我又成日帶佢出街，所以佢唔係咁驚人。」

長得肥肥白白，十分可愛的Sebastian，原來出世時驚險萬分，Ankie說：「由我懷孕開始，我已經希望可以自然分娩，點知BB出世嗰日，我陣痛咗五個鐘，BB仍然出唔到嚟，當時醫生同我講，BB心跳開始有啲唔正常，我嘅血壓又愈來愈高，如果唔盡快開刀，大人細路都可能會有危險，最終惟有決定開刀，幸好BB出咗世，檢查過後一切正常，仲重4kg，總算有驚無險。」

上月，貝安琪為兒子Sebastian舉行以藍色為主題的百日宴，一家三口在蛋糕前合照，十分溫馨。

製奶機器

產後，Ankie沒有依照中國傳統坐月及進補調理身體，她笑說：「因為當時我媽咪好忙，未婚夫又唔喺身邊，得我一個人，同埋一個每日只嚟一至兩個鐘的陪月幫我手。補品都無食，因為我由十四歲開始已經茹素。不過唔知點解，BB出世前一個月，突然好想食豬肉，當時每星期起碼食兩次，但生完後又唔想食喇！」

為了令BB更健康，由兒子出世至今，Ankie一直餵哺母乳。「每兩個鐘就要餵一次，雖然好辛苦，而且我覺得自己有啲似milk machine﹙製奶機器﹚，不過為咗佢嘅健康，再辛苦我都唔怕。」

Sebastian眼仔碌碌，與父親猶如餅印。