古巨基有個賢內助
廿幾年前,古巨基開始做歌手時,陳英雪(Lorraine)已默默跟隨佢做隱形女友。咁多年來,基仔為保事業,從來唔提戀情,但Lorraine都不離不棄,仲紆尊降貴做男友嘅助手貼身伺候。皇天不負有情人,一四年七月,兩人終於喺拉斯維加斯註冊結婚,結束廿年嘅馬拉松愛情長跑。
除演藝工作外,基仔都有搞生意,好似開時裝店,而三年前仲搞咗間餅店添!而貴為天王級歌手嘅佢,又點會成日落舖頭打點一切呢?呢個重任當然係交畀佢老婆Lorraine嘞。
中秋節快到,為咗幫餅店促銷月餅,東姑呢一日就發現,Lorraine親自喺崇光地庫嘅超級市場力seIl。同時,佢又親自切月餅出嚟畀大家試味,仲好有耐性咁講解各款月餅嘅餡料有乜分別。基仔有呢位賢內助幫佢打理生意,當然無後顧之憂啦!
服務顧客至上,Lorraine當然要笑容滿面咁力sell啦!
Lorraine除咗為顧客講解折扣優惠,仲親自切餅畀啲客人試食。
東姑睇到Lorraine嘅眼袋咁大,就知佢為咗呢檔生意付出咗好多精力。
基仔同Lorraine拍咗廿年拖,終喺一四年七月,於拉斯維加斯註冊結婚。