懲教署邱Sir 難忘白石一戰

懲教署署長邱子昭一份工做足三十七年，見證由監獄署到懲教署的歷練，加上他是個健談的人，外界對鐵窗生涯的認識自然增多。

在鄧鏡波書院畢業嘅佢，一九八○年已加入懲教署，佢話最難忘一戰，係佢八十年代駐守白石難民營時，某次佢一人力敵幾十名船民。當時營內有南北兩越船民共住，不時起爭執甚至打架。某次又有幾十人追着一個船民來打，「佢避無可避，竟然跑過來躲到我身後，好似麻鷹捉雞仔咁，我變咗保護個船民嘅母雞，二十個攞住鐵枝嘅船民即時圍住我倆喊打喊殺，叫我『快啲走開，唔係殺埋你。』當時圍觀的大大話話有幾百人，稍一差池，分分鐘搞出人命。」

夾在中間的邱sir人急智生，即時大喝一聲，可能佢平日份人嚴肅公正啲，呢一喝拋得班船民窒咗一窒，就係呢十來秒拖延，其他同事趕得及到場，拉開那位船民，避免事件惡化，「無機會諗驚唔驚，只係諗點樣保護到佢哋，當然同事團隊精神也好重要。」這個場面，被趕到現場的高級監督看在眼裏，激讚佢和一班同事處理得宜，他因而獲「花雞繩」署長表揚。

「那些年在白石其實好感觸，船民因戰亂乜都無來到香港，睇唔到將來，經常因好小事就打鬥，命都無埋……香港太平盛世得來不易o架。」

除了更生，邱sir仲做埋「防患未然」，大力喺青少年群裏推行「思囚之路」，邀請學生參觀監獄更試埋坐監滋味，「好多學生嘻嘻哈哈的來，但當監倉門關上，有的不足一分鐘就喊着要出來，離開時個個靜晒，就知道實地感受犯罪後果入到佢哋嘅心，識得諗失去自由係咩滋味，有時同事仲會話電話、iPad都無得睇啦，畀學生知道原來犯罪後果係咁。」

邱sir本周一正式退休，結束三十七年懲與教歲月，佢話最開心係釋囚再犯事的機會大幅降低，由二千年近百分之四十，大幅下跌至最新一四年近百分之二十六。「有個青年進進出出監獄多年，到我今日退休佢仍然在監內，仲祝我生活愉快，我好感觸，不過我們仍然要畀機會佢，我嘅格言係，救得一個得一個。」