男神貼地銷青政

「男神」劉鳴煒「炒自己魷」成功，佢做主席嘅青年事務委員會，升格做青年發展委員會，主席由政務司司張建宗出任，資源協調上應更得心應手。不過鳴煒並未就咁停落來，最近瞓身搞「極速約會」（Speed Dating）（下圖），自己都落埋場，用貼地方法接觸年輕人。

極速約會是幌子，其實係一個以速配形式進行嘅青年政策FocusGroup，不過用上青年人熟悉嘅「語言」，大家在較放鬆嘅狀態下暢所欲言。

諮詢會是搜集意見的方法，不過有時太官式未必聽到嘢，鳴煒比較夠膽試唔同花樣，開面書、微博係基本功，從來唔跳舞嘅佢連街舞都學埋。透過輕鬆互動，佢聽到唔少心聲，例如有後生仔透露自信不足，同阿爸阿媽細個經常打罵有關，而對香港前景悲觀，覺得欠缺機會發展；話想移民的也有唔少。原來自佢上任以來，做咗不下五百場唔同種類嘅諮詢會，有時晚晚都有活動，唔怪得佢話呢份工其實應該全職做。

未來仲會搞類似「極速約會」，佢諗過請一些「宅男宅女」，來到時一人一部電腦，等佢哋用最習慣嘅方式在網上傾偈；幾十人在同一個空間面對面不直接說話，只有鍵盤發出的聲音，場面諗落都幾趣怪。

呢屆政府有幾重視青年政策，從特首林鄭月娥未上任前已不停講要解決年輕人三業（學業、事業、置業）問題已見端倪，上任後佢即將青年事務升格，不妨考慮多用些天馬行空方式，政策自然更加到位。

鳴煒制訂緊香港第一份青年政策，預計年底面世，佢參考唔同國家做法，希望作出一點實際建議，不過佢笑話四十歲以後，就「too old」再為後生仔做嘢，係時候退咯。