劉愷威融入「太太團」

劉愷威同佢嘅國產女星老婆楊冪，雖然不斷有傳感情亮起紅燈，但係夫妻二人對佢哋粒寶貝女小糯米，就錫到燶，無論幾忙都好，兩公婆都一定抽出時間，返嚟香港照顧囡囡。

好似早排，小糯米嘅三歲生日，劉家同楊家仲總動員合體喺香港嘅深灣遊艇會同佢慶祝添！

此外，劉愷威直情係廿四孝爸爸，因為老婆楊冪多數喺國內開工，而只要佢喺香港，就一定堅持做「帶子洪郎」，親自去到小糯米就讀嘅銅鑼灣一間幼稚園湊女放學。

東姑早排又見到佢，一早去到校門口，同成班家長一齊排隊等湊女放學，可能因為佢去湊女去得實在太多太密，見佢同成班家長太太團已經熟到有講有笑，仲一邊排隊一邊猛講湊女經添。

雖然劉愷威喺國內係當紅嘅一線小生，仲行開靚仔偶像派路線，但為咗囡囡着想，不惜拋頭露面同啲家長太太打好關係，可謂紓尊降貴，確實好難得，佢嘅愛女之情真係無容置疑！

劉愷威一唔使開工就返香港，仲會做「湊女公」，去到小糯米嘅幼稚園接女放學，去到連啲家長太太團都同佢熟晒，大家有傾有講。

劉愷威同其他家長一樣，喺門口排隊等接囡囡放學；期間，佢仲熱到出晒汗要除帽兼狂飲水。

親自入埋學校接小糯米嘅劉愷威，一臉慈父樣，果然錫女錫到燶。

小糯米精靈又活潑，一放學即似「甩繩馬騮」，用力甩開嫲嫲隻手亂跑，劉愷威惟有喺旁邊勸阻。

楊冪喺一四年六月於香港誕下小糯米，唔經唔覺囡囡已經三歲喇！