落實現在　放眼未來

林鄭月娥、曾俊華同胡國興都能夠順利參選特首，入閘後嘅三位候選人，於今個月二十六號將對壘展開特首寶座爭奪戰。葉劉淑儀攞到遠低於一百五十張提名票惟有棄選，連續兩次未能成功，對佢嚟講應該係百般滋味在心頭，亦都係一個遺憾，但佢喺兩次候選活動上都表現得好有誠意，直到最後一刻仍然努力去拉票，的確值得一讚。

胡國興攞到一百八十張提名表，清一色來自非建制派選委，佢最大嘅票源來自社福界，攞到六十個選委中嘅五十五票，胡官當初決定參選話要阻止梁特首連任，依家當然轉向追擊林鄭。手握五百八十張提名票嘅林鄭月娥，我唔知佢係咪好打得，選戰開始佢應該同時會被胡官同薯片兩面夾攻。曾俊華攞到一百六十五張提名表，我覺得喺被年輕人接受同人緣層面上，佢已先勝另外兩位候選人一仗。

簡略睇咗幾位候選人嘅政綱內容，雖不盡相同但都離唔開喺經濟同民生議題上落墨，我明白地方政策唔係一個簡單嘅議題，但都希望候選人唔好只係紙上談兵，我哋實在需要特首協助解決社會上具體嘅問題，我更奢望香港同內地嘅政治衝突、文化差異，可以因為新特首而有所緩和。香港經濟雖未至於開倒車，但欠缺長遠持續發展對策，社會上分歧雖未惡化至極端，但社會內部對立撕裂已經存在，我好希望無論邊個做特首都會被大家接受，除咗特首香港何嘗唔需要一個機靈又實幹嘅團隊去配合執政，最重要大眾市民可以用包容嘅態度去接納新特首施政，講到底我都只係想見到從前朝氣蓬勃嘅香港可以繼續欣欣向榮。

潘多拉盒子（Pandora's box）已經被打開咗，從雨傘運動至今，香港面對種種嘅問題，唔理係咩都變得政治化，係時候大家撫心自問，唔理邊個啱或者邊個錯都好，其實袋住先又有咩唔好，呢個世界上除咗藍色同黃色，其實仲有好多種顏色，點解一定要標籤人哋同自己，唔一定要係非黑即白，無人能夠預知香港嘅未來，亦無人能夠改寫已經發生咗嘅事，但如果大家繼續互不相讓，往後執政嘅同施政嘅都會舉步維艱，各走極端亦唔見得對任何一方有任何好處，地方政策如果唔傾斜同埋有實質內涵，又切合到群眾真正需要嘅就已經係好政策。