梁小冰匿埋老點

日前，梁小冰同陳法蓉出席「慧姸雅集」一個慈善活動，為咗一件外套而嗌交，小冰不滿畀陳法蓉當眾鬧；而陳法蓉就話咁大隻死貓啃唔落，兩個女人你一言我一語，霸佔幾日娛樂版。而日前，小冰出席首映禮時就表示決定退出慧姸雅集，仲揶揄話：「如果我見到佢（陳法蓉），我驚會好似見到曱甴咁走開！」此外，與小冰同屆嘅冠軍袁詠儀，亦出言力撐老友退會，又暗寸：「冇咁榮幸撞到（陳法蓉）！」呢場「慧姸之亂」認真一地花生。

早排，東姑咁啱就喺筲箕灣嘅海濱公園，撞到自稱「烈女」嘅小冰。當日，佢帶住攝影師、製作人員、一班演員，一行數埋唔夠十丁友，似係喺度取景拍嘢。現場所見，小冰全程都冇喺幕前演出，反而企喺攝影師後邊，不停細細聲指導拍攝；此外，佢見到一男一女演員做極都唔到位，即刻忍唔住走上前親自試範。不過，佢雖然指指點點，但係刻意壓低把聲，說話陰聲細氣；而且，見有途人駐足觀看，仲好似有啲怕醜咁，立即擰歪面。

後來，東姑上社交網，先知佢當日原來幫一條音樂短片業餘做副導演，可能自覺做幕後經驗不足，所以唔好意思老點人做嘢，先會出現佢咁靦腆嘅畫面，所以話佢係「烈女」，其實都係睇人睇情況，私下小冰待人都相當斯文客氣嘅！

早前，小冰喺筲箕灣嘅海濱公園，連同攝影師，及一班演員，喺度取景拍嘢。

小冰喺微博透露，佢原來今次幫音樂短片，業餘做副導演，一嘗做幕後嘅滋味。

小冰（左）指點工作人員拍嘢，全程陰聲細氣，而且，遇着途人眼望望，仲好似有啲難為情，即刻擰歪面。

難得可以退居幕後，一嘗做副導演嘅滋味，小冰都大呼好玩過癮。

日前，小冰同陳法蓉公開駁火，事緣因為小冰着漏咗件外套，畀對方當眾鬧，搞到小冰嬲爆。