主頁 > 專欄 > Paco巨星飯堂 > 披頭光輝歲月 2016 年 12 月 01 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

披頭光輝歲月

好嘅音樂，同驚世巨著一樣，對世人影響深遠，唔係邊度有咁多不朽金曲？時間不能夠沖淡嘅殿堂樂隊，首選一定係影響力跨世紀嘅披頭四（The Beatles），而今次「Paco巨星飯堂」嘅嘉賓，就係因為呢隊Band霸而組成新樂隊！

鍾鎮濤B哥哥同鄧梓峰，分別係演藝界同司儀界嘅代表人物，佢哋連同兩位本地資深嘅音樂人：鼓王青蛙同結他王阿Joe，組成新band OLD BOYS，專玩影響佢哋至深嘅披頭四金曲，極具代表性。我帶四位OLD BOYS去到位於灣仔嘅「雙喜樓」，品嘗特色嘅懷舊廣東菜，再細說音樂經。

因緣際會下，B哥哥（前左）同香港兩位資深musician蛙爺（前右）、阿Joe（後左），加上最令人估唔到嘅梓峰（後右），組成樂隊OLD BOYS，專玩披頭四嘅音樂。

專玩冷門金曲

話說OLD BOYS成軍，除咗Beatles嘅魅力，仲有B哥哥嘅行動力。「我喺facebook睇到蛙爺post咗佢同Patrick（梓峰）、阿Joe玩Beatles嘅歌，我就叫蛙爺下次再玩就預埋我，於是就有OLD BOYS嘅出現。OLD BOYS係同學會嘅意思，唔係old嘅意思呀！打band對我嚟講，就好似人哋打牌、打golf咁，但打band一定好玩過打golf！」

哈哈哈！一般人一定知道B哥哥嘅音樂底深厚，而梓峰就係一代司儀，我就覺得可以同蛙爺、阿Joe兩位資深音樂人敍舊，一樣咁難得。鼓王蛙爺話：「我哋夾OLD BOYS，係因為我哋四個都畀Beatles影響得最深，以前同B哥哥走埠咁多年，大家都冇講過Beatles對自己有幾大影響，到最近至講起，就夾咗隊band嘞！」

一講起偶像，梓峰都好雀躍。「Beatles嘅歌詞、旋律都好好聽，啟發好多人，啲配chord、和聲都好實，o依家去任何國家嘅唱片舖，佢哋都係喺Pop嗰個類別，唔會係Oldies but Goodies嗰類。我聽Beatles係因為我阿哥，到自己識聽嘅時候，就特別鍾意〈In My Life〉嘅歌詞，仲有〈Eleanor Rigby〉全弦樂嘅arrangement。」

阿Joe話：「我哋玩Beatles嘅歌，唔會玩好多人玩嗰啲，〈Hey Jude〉同〈Let it Be〉一定唔玩；B哥鍾意〈Help!〉、〈You're Gonna Lose That Girl〉、〈The Night Before〉。」

今次嘅嘉賓OLD BOYS全部都係我嘅老友記或戰友，我就帶佢哋去到位於灣仔嘅「雙喜樓」，品嘗特色懷舊廣東菜。

OLD BOYS嘅成軍可謂無心插柳，而佢哋亦專一到只玩Beatles嘅音樂，已經大把知音，佢哋已有facebook專頁：facebook.com/OLDBOYS.HONGKONG。

雙喜即燒乳豬（$758一隻/$388半隻），選用平均重近五公斤嘅越南乳豬製作，皮脆肉嫩。

淮杞螺頭燉老雞（$368/2-3位用），落足料燉製四小時，相當滋陰。

鐵板叉燒皇（$138），係精選最上品腩位炮製，入口即溶。

傳承音樂精神

阿Joe啱啱講嘅B哥哥心水，全部都係披頭四喺六五年上映嘅電影《Help!》嘅配樂，「呢齣戲係我學生時期睇得最多嘅戲，我好鍾意。以前冇錄影帶、DVD，所以我就儲錢買飛入戲院睇，成隻soundtrack啲歌我都好熟。o依家我哋出gig嘅rundown通常係我編嘅，我就揀啲少啲人識嘅Beatles金曲，畀我哋自己enjoy吓玩吓先，然後想畀啲人一齊唱，先編首〈Can't Buy Me Love〉或者〈A Hard Day's Night〉落去囉。

「我哋之前喺HMV玩咗兩晚騷，之後啲邀約就如雪片飛來，主要係一啲私人party，佢哋聽得high，我哋都玩得興奮。o依家就算只係練歌，我返到屋企都仲好激動，只有Beatles有呢個威力。如果唔係佢哋，我都唔會玩音樂，亦都唔會有o依家，所以就想傳承佢哋嘅音樂精神。」

B哥哥稱蛙爺為香港第一代鼓王，我絕對認同。

雖然OLD BOYS曾經喺十月於HMV作公開演唱，但B哥哥話佢哋係用嚟滿足一眾成員嘅少年音樂夢，其他演出仲喺計劃之中。

蛙爺（右二）早年同唔少巨星走埠演出，當中包括溫拿嘅彭健新（左一）、譚校長（左二）同葉智強（右一）。

不論係歌神阿Sam，定係已故嘅哥哥、阿梅（中），都同蛙爺交過手，右為梅愛芳。

砵仔雞蛋焗魚腸（$98），屬懷舊名菜，工序繁複，

薯仔藕片香辣蟹煲（時價），鮮味無窮。

推出發燒黑膠

OLD BOYS由內至外都臥虎藏龍，啱啱榮獲「Cash音樂成就大賞」嘅B哥哥，就繼續佢大忙人本色，喺今個周末（12月3日）舉行嘅《歡樂滿東華》，就一人分飾三角，「我會同溫拿、溫拿加太極同埋OLD BOYS表演，梓峰都要兼顧做司儀啦！OLD BOYS係純興趣嘅演出，『溫拿耍太極』就係溫拿加太極喺一月嘅show，開頭佢哋仲話想叫『溫太』，好似教人煮餸咁！

「呢個陣容好大堆頭，出親嚟都十幾個人，連歲數都好大堆頭，有成六百幾歲！其實溫拿同太極識咗好耐，尤其係Patrick同Joey Tang，成日都有幫我哋做backing，不過齊晒人咁玩都係第一次。今次個show喺機場博覽館搞，好多外國band都喺嗰個場開show，咁我哋就可以名正言順玩好多英文歌，好似係我哋初出道嗰時嘅歌，但就唔玩Beatles。」

B哥哥仲有一啲個人大計：「我一直都好想做黑膠碟，o依家已經錄好音，但係要到明年中先出到，有咩歌就未公開得住，總之好多係我自己寫嘅，都係樂迷耳熟能詳嘅歌。」

為咗聽B哥哥嘅原音，等到一七年中，有心嘅樂迷一定會等嘅。