主頁 > 專欄 > Paco巨星飯堂 > 平心揚佛法 2016 年 11 月 26 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

平心揚佛法

近年香港人怨氣、戾氣太多，我想從娛樂角度去為佢哋帶嚟歡樂，但歸根究底，從心靈出發，令心境平和先係治本方法。身為佛教徒嘅王馨平，最近就以佢擅長嘅方式弘揚佛法—唱出《心經》，既可慰撫同道者，亦令人重新了解呢部精深嘅佛學經典，得到心靈嘅平靜。

今次「Paco巨星飯堂」，我就誠邀Linda去到位於銅鑼灣嘅頂級食府「鹽澤」，品嘗最出色嘅鐵板燒料理，再細說佢與佛學嘅緣份。

佛教徒Linda有緣唱出《心經》，以一個最令人容易明白嘅方式，弘揚佛法。

我帶Linda去到最頂級嘅鐵板燒食府「鹽澤」，品嘗以最出色食材製作嘅料理，再聽佢分享生活點滴。

友愛有緣人

音樂陶冶性情，《心經》配上音樂，就更容易令人平和。今次Linda有緣重新演繹《心經》，都係一次因緣巧合。「九月嘅時候，我去參加Kennis Tai（四洲太子女戴凱欣）嘅生日party，認識咗一位好有心嘅朋友，佢一直都有參與製作圖文並茂版嘅《般若波羅蜜多心經》，又可以畀有緣人自己抄寫。當時我覺得呢件事好有意義，於是我就問呢位朋友，我有咩可以出到一分力。

「我話我一直有一個心願，就係唱與佛有關嘅歌，呢位朋友就提議我唱《心經》，於是我哋就開始籌備，我仲搵咗同我合作好耐嘅監製幫手。Paco你知廣東話嘅曲，又要啱音；而《心經》又唔係流行曲，模式好唔同，我覺得譜曲嘅難度好高。後來我聽鬼才林敏驄譜嘅曲，一聽就覺得首曲同《心經》好夾。有呢首曲之後，其他嘢都好順利。」

因為好友戴凱欣（左二）嘅生日會，令Linda（右二）有緣重新演繹《心經》。旁為Linda丈夫Stephen（右一）及戴凱欣男友Justin。

Linda表示，佢所唱嘅《心經》由林敏驄作曲，旋律係佢所聽過之中，最適合唱頌誦《心經》嘅。

餐廳為客人提供度身訂造菜單，詳情及價格請致電餐廳查詢。今晚為我同Linda所設計嘅菜單，就包括呢道特選前菜，係選用最時令同最頂級嘅食材製作，每次嘅組合都唔同。

鹽澤魷魚秋葵卷配紅椒酸汁，外層為經火槍炙燒表面嘅新鮮魷魚及海膽；內裏為營養豐富嘅秋葵，配上餐廳特製嘅紅椒彩椒汁，不論外觀定味道都層次感十足。

齋戒顯誠意

既有緣又有鬼才譜曲，Linda為表誠意，亦下過一番工夫。「我覺得要做一啲嘢，去表達自己唱《心經》嘅誠意，所以我就喺錄音之前齋戒三日。因為我唔想呢頭食肉殺生，嗰頭去唱《心經》，所以咁做係令自己內外都ready去做呢件事。」

今次Linda所唱嘅《心經》，跟昔日嘅版本都有所不同。「之前好多都係得廣東話版，我想做多少少，於是就唱埋普通話版，令多啲人可以明白《心經》嘅奧妙。」

Linda係誠心嘅佛教徒，佢話：「我睇佛經、唸經，都喺字裏行間得到一啲領會，呢啲領會都令我嘅心境平和，令個人好舒服。而每個人對經文嘅領會都會唔同，所以我希望其他人聽到我唱嘅《心經》，都有自己嘅領會，得到平靜。」

為咗顯示誠意，Linda喺為《心經》錄音前，特別齋戒三日。

由Linda主唱嘅《心經》CD（左圖），會隨免費派發嘅《般若波羅蜜多心經》（右圖）附送。

極上刺身拼盤選用每日最新鮮嘅刺身炮製，鮮味無比。

鐵板日本鮑魚配松露及柚子汁，以特選嘅青森縣鮑魚製作。

作為全港首間以鐵板燒方式炮製西班牙紅蝦嘅餐廳，「鹽澤」選用嘅西班牙紅蝦，全部經人手挑選，確保每隻紅蝦嘅大小、蝦糕量相若，質素有保證。

我特別推介呢個西班牙深海紅蝦拼西班牙蝦膏炒稻庭烏冬，睇住大廚先喺鐵板上挑走蝦殼同蝦腳，然後中間剝開蝦肉，將兩邊煎至半熟，同時將蝦腳煎至脆卜卜，而蝦頭內嘅蝦膏則跟烏冬一同炒香，讓客人食盡紅蝦每一部份。

爆驚喜煮父

雖然為《心經》錄音，Linda齋戒三日表誠意，但係平日嘅佢，對食係「來者不拒」。「我咩都食o架！不過o依家就好少自己下廚，我老公成日都要去第二度做嘢，返到嚟屋企佢都唔想我煮嘢食，所以通常我哋都會出街撐枱腳。但係喺我心目中，煮一餐家常便飯並唔係一件難度高嘅事，因為我爹哋好鍾意煮嘢食，對食又好有要求，所以佢煮得好叻，一般花膠、鮑魚，佢都煮得好好食。

「我記得有一次佢喺屋企請客，仲煮埋熊掌添！不過我就冇食，所以唔知個味道係點。今晚食嘅鐵板燒，佢都試過喺屋企set過！所以我由細到大都有好多偷師觀察嘅機會，只要唔係複雜嘅菜，我都有信心煮到。」

哈哈哈！估唔到除咗「獨臂刀」，大俠王羽連揸鑊鏟都係高手！難得係Linda咁好食神，到o依家都keep得到身形。「我每日都有好大嘅運動量，有時係打golf，通常都係做瑜伽。其實我o依家讀緊一個瑜伽導師課程，每日七點就要上堂，做好多動作、讀好多理論，到傍晚六點至落堂。所以食呢方面，我就可以好放心，唔使就住就住。」