生意兩度仆直 孫耀威講道變宣傳新店
消失樂壇近兩年的孫耀威,早前先後在上海和台北投資餐飲業失利蝕過千萬,與女友陳美詩婚期一拖再拖,他惟有返內地繼續拍劇、拍電影,吸金補給。恨過老闆癮的他,有賭未為輸,近日又斥千萬在港開設自家品牌賣男士禮服。
由於生意正在試業階段,落力催谷的他,日前到大埔為佈道會任見證嘉賓,講道之餘,又不忘做人肉生招牌,介紹自家服飾及公開店舖位置,果然唔放過任何宣傳機會。
日前孫耀威身穿自家品牌西裝,在大埔某中學為佈道會任見證嘉賓,講完道又大肆推廣新店,乘機宣傳。
做生招牌
當晚他在大埔一間中學,為《一生最美的祝福》音樂佈道會做見證,場內約有近百名街坊,身穿自家品牌西裝的他,席間大爆與父親交惡多年,但因父親一次眼中風,造就父子關係得以修補。「我爹哋做公務員,做到好高級。直到幾年前,佢眼中風,一隻眼盲咗,另一隻眼得番一成視力,連去廁所都行唔到。」自此孫耀威開始懂得孝順老父,扶他過馬路之餘,又帶他飲茶、返教會,令孫父大為感動。
見證去到尾聲,團長蔣麗萍遂走上台,趁蔣麗萍大讚其牛仔西裝出色時,他即打蛇隨棍上直認︰「係小弟最新設計。」繼而大賣廣告指西裝已於尖沙咀開店發售,場內信眾明知他hard sell,也畀足面拍手打氣。
孫耀威穿上扣滿別針、充滿搖滾味道的西裝,大擺甫士拍硬照,款式好大膽。
店內掛滿各種各樣的西裝,一旁還放有煲呔作陪襯,但未有掛上價錢牌。
為品牌拍廣告,他不時做gym狂操,着衫會好睇啲。