現年四十歲的Neway太子爺薛世恆（Daniel），自一三年與陳法拉離婚後，緋聞是非不斷，不但被傳與胞弟薛嘉麟爭上位鬧不和，更有指他三年間不停換畫，花花公子形象深入民心。

對於傳聞，薛世恆笑言會一笑而過，但講起前度，他即落閘：「我唔係咁想提及（感情事），唔想影響到朋友（陳法拉）！一段感情嚟到呢個地步，我都有反省過自己，第一係我唔識溝通，第二係有啲自我。o依家我揀對象，唔會要求人哋要點點點，反而會要求咗自己先，ready好自己後，再隨緣。始終吓吓都一支公，都希望有個伴陪吓！」

緣來緣去，薛世恆還是選擇隨緣而安。

雖然家中做卡拉OK生意，但薛世恆笑言，平日很少去唱K：「我做卡拉OK工作五年，同同事經歷咗好多難題，佢哋咁辛苦工作，我好難在場玩樂，所以我好少唱K。」

薛世恆與陳法拉於一三年分手，兩人從未對外承認已婚一事。

想搵個伴

昂藏六尺的薛世恆，見面第一眼，已覺得他似「牙佬」袁偉豪，「我幾乎日日都被人認錯，連我阿媽都覺得似！ 有時我食完飯，準備離開餐廳時，啲人都會同我講：『Bye Bye啦袁生！』 亦會有人行過嚟要求同我影相。開頭我都會同人解釋，但搞到人好尷尬，最後都係要同佢影相，不過我唔介意，都幾好呀，香港先生嚟o架嘛！」

首次接受訪問的他，過去從來不回應是非傳聞，今次破例回應，皆因生活受到影響。「我覺得好多人都曲解咗我，因為我成日都唔回應，結果愈描愈黑、愈搞愈複雜，佢哋（報章雜誌）就愈寫愈開心。話我同邊個拍拖，同細佬不和，仲話我爭家產，唔多唔少都影響到我嘅生活，而事實上唔係咁，我阿爸仲在生，爭乜鬼產？我想大家了解一個真實嘅我，唔係一個花弗、唔識生產嘅人！」

當事人逐項澄清，先是大眾最關心的感情事，雖然薛世恆開宗明義講明，不想提及感情事，但多年來他先後與梁雨恩、廖碧兒、朱璇等傳緋聞，難免會令人覺得他是花花公子。

「好多都係朋友，我唔想特登提及佢哋個名，好似去製造緋聞咁，但講真，每個人都有好多嘢想收收埋埋，我睇咗失實嘅報道之後，都會覺得唔開心。之前有雜誌影到我同六十個女仔一齊過生日，其實都有六十個男仔喺度，但就唔提。有次我同一個教會朋友坐低傾偈，點知（報章）出咗嚟就話我溝中女，搞到我好唔好意思 ，成日令到身邊嘅女士都驚咗我！」

貴為鑽石級王老五，有女埋身是常識吧，薛世恆坦言，好心急找個伴，共同度過下半生。

「我對感情有期望o架！我年紀都有番咁上下，當年想三十五歲結婚，o依家都已經四十歲，target早就過晒，所以我好心急，都想搵番個伴；亦想有小朋友，仔女都無所謂，但呢啲嘢急唔嚟，爸爸亦都無催。雖然我成日畀人影到同圈內人（拍拖），但其實圈外圈內都無所謂，我係睇佢人品，最緊要係心底好，唔係得把口講，要用行為表達出嚟！」

七月生日的他（前左），與母親、胞弟及胞妹一同慶祝：「我生日係慶祝媽媽生養我哋三兄妹！」

薛世恆（前左）八歲時與胞弟薛嘉麟及父母到英國旅行：「從細到大屋企人工作都好忙，所以對於一起去旅行嘅印象會特別深刻。」