暑假黃金檔期，梗係要捧吓港產片場！今周上映嘅《驚心破》，集劉青雲、謝霆鋒兩大影帝於一戲，預期戲味、張力濃郁。今次「Paco巨星飯堂」，就邀請到電影嘅導演吳品儒，連同兩大男一嘅拍檔譚俊彥（Shaun）同雨僑，細說呢部鬥智鬥力嘅懸疑新作背後嘅故事。

我帶三位嘉賓去到位於尖沙咀嘅「上海小南國1987」，品嘗特色上海菜，咁至講得更落力！

我帶阿Shaun、雨僑同電影《驚心破》導演吳品儒（左至右），去到位於尖沙咀嘅「上海小南國1987」，品嘗特色上海菜，暢談拍攝電影嘅點滴。

霆鋒（左三）同阿Shaun（右）相識多年，今次係二人第一次合作拍電影。

籌備十多年

雖然電影係吳導首執導演筒嘅作品，但係佢係一位資深嘅電影人，從佢搵嚟名導葉偉信擔任電影嘅監製就知！而且佢相當有heart，喺多年前已經有電影嘅概念。「部戲係探討人類嘅細胞記憶，我喺十幾年前已經諗到呢個概念，不過直至一三年我先正式寫劇本。因為個古仔係喺香港發生，所以我就搵嚟青雲同霆鋒，分別飾演兩個男主角。

「至於阿Shaun同雨僑，就係較為有新鮮感嘅演員，成個拍攝過程都好smooth，係我用咗一年時間去做電影後期，慢咗啲啫。」

哈哈哈！係吳導慢工出細貨啫。電影對阿Shaun嚟講，亦都別具意義。「我同霆鋒由細識到大，但係我哋入行咁耐都冇合作過，今次係第一次。喺戲入面佢係香港警察，我就係國際刑警，我哋聯手查案，加上我哋有足夠時間去排戲，所以交流得好好。

「同埋拍呢部戲嘅時候，我太太又咁啱懷孕，所以對我嚟講特別有意義。」

冷菜拼盆（$198/例）係任選四款前菜作自由配搭嘅菜式，有四喜烤麩、本幫糖醋小排、紹興花雕醉雞、翡翠百葉卷、秋葵拌木耳、老上海燻魚、海蜇頭等，以供選擇。

寶塔肉配荷葉餅（$228/例）係大廚以精湛的刀工將優質豬腩肉，完整地製作成寶塔形狀，內裏為上海直送嘅乾菜筍，非常惹味。

南國薑蓉雞（$298一隻/$158半隻），以客家鄉村原隻蒸雞煮嘅方法，保留走地雞嘅鮮味，表皮脆香、肉質細嫩。

 集兩大影帝

既然有兩大影帝嘅「加持」，導演就一定要劇透少少，畀身為觀眾嘅我有啲心理準備。「青雲同霆鋒分別飾演犯罪心理學家同幹探，喺一個偶然嘅情況下，佢哋分別移植咗一個連環殺人犯嘅肝同心，於是就有一連串嘅事發生。」

導演表示，兩位影帝都極具專業精神。「霆鋒睇過劇本之後就接咗呢部戲；青雲就做晒人物分析，闡釋晒佢個角色係一個悲劇人物。埋位嗰陣，我只係需要提佢哋嗰場戲嘅上文下理，等佢哋演得連貫就OK，佢哋喺演繹上都係神級人物，我連take都唔敢take太多！」

飾演警察嘅雨僑就話：「要同兩個影帝合作，我壓力大到第一日開工連企都企唔穩！因為我嘅對白入面，好多案情分析，所以通常佢哋都要望實我，我就好驚記錯對白，不過佢哋同導演都對我好好，畀咗定心丸我，令我可以relax啲去演。」

當導演（右一）對兩位影帝表現有讚冇彈之際，阿Shaun（左一）同雨僑（右二）兩位演員就盛讚導演經常向佢哋大派定心丸，令佢哋嘅壓力大減。

阿Shaun豪言，霆鋒飾演警察堪稱全港最型。

實力派嘅仲有同青雲有大量對手戲、飾演佢太太嘅鄧萃雯。

青雲（右）同霆鋒（左）兩大影帝交鋒，觀眾先係最大得益者。

三位嘉賓對大廚Andy嘅功力都大表欣賞，自然要合照留念。

鍾情上海菜

好戲固然令人期待，好菜就要我同嘉賓們立即品嘗！原來吳導同阿Shaun都情傾上海菜，吳導表示：「我九十年代就上上海拍戲，所以對上海菜都有啲感情，由當時嘅重口味醉蟹，到o依家集其他地區大成嘅進化版菜式，我都好欣賞！」

阿Shaun就話：「我自細跟婆婆大，佢係上海人，所以食慣佢整嘅上海菜，烤麩、獅子頭，乜都有！到佢唔喺度，我仲好懷念嗰種偏甜嘅味道。」

慢燉安格斯雪花牛肉（$298/例），選用安格斯雪花牛肉炮製，以慢燉嘅烹調方法，保留肉汁，醬香濃郁、肥而不膩。

如意鍋燒黑豚肉（$298/例），特選肥瘦適中嘅黑毛豬豚肉，以紹興陳年花雕、上等醬油及冰糖等，於鍋中慢火煨燉，令肉質變得鬆軟。

麻婆豆腐愛上魚（$288/例）屬餐廳創意之作，將新鮮多寶魚以人手起肉，然後用魚肉跟麻婆豆腐一齊炒製，提升味道同口感。

豆漿勝瓜（$88/例）以勝瓜、杞子、濕雲耳，配上有機無糖豆漿輕輕一煮，清新可口。

椰汁江南八寶飯（$68/例）有別於傳統上海甜品，濃郁嘅椰汁配上八寶飯，味道多層次。

上海小南國1987

地址：尖沙咀麼地道66號尖沙咀中心UG2層2-13及45-51號舖

電話：23698899