那些年我當主播的日子 林燕玲
每朝起牀，開電視看《香港早晨》，或許已成為不少打工仔的例行習慣，女主播亦自然成為節目的一大賣點。
一代新聞之花、前無綫主播林燕玲（Ruby），其綽號「小飛俠」被嗌到路人皆知，就算事過十多年，她依然擺脫不了主播形象。「o依家仲有好多人覺得我係主播，係（新聞）小花，o依家老花就有我份，哈哈！」
要脫下主播光環，惟有破釜沉舟。離開新聞界後，她做過財經節目主持，又從事過金融界，現則為麗新集團傳訊事務副總裁，力求轉型成功。「無論去到邊，我總會聽到好多批評，啲人會覺得一個前主播會識得啲咩吖，但我唔介意，人哋叫得我去做，就代表我有能力勝任。佢哋都信我，我又有咩好怕？」
經過那些年，林燕玲才有現時的視野和胸襟，身份大概已不成問題了吧！
現年三十八歲的她，雖然對感情事大賣關子，但就公開擇偶條件：「我唔係一個工作為上嘅人，鍾意陽光、有上進心同健康嘅男仔！」
愛上女主播
比起十多年前於電視上正經八百報道新聞，眼前的林燕玲多了一份親切感，惟獨一頭清爽短髮，始終沒變。「我啱啱入無綫嗰時有試過留長頭髮o架，但真係唔好睇，千祈唔好睇番我長頭髮個樣！」
畢業於香港科技大學生物化學系的她，初出茅廬時乜都敢試，一畢業即到港龍航空面試做空姐，不夠一年，又轉到生物科技公司做商業發展工作，其後更踩過界，應徵做記者，結果一擊即中。
「嗰時我（做科技公司）個直屬上司好錫我，但佢要離職，我又唔想跟其他人，所以就同佢一齊離開。當時（〇三年沙士）好難搵工，我寄咗好幾份CV（求職信）出去，得TVB有回覆，因為當時銀河衛視（無綫收費電視前身）準備開台，要請好多人， 咁啱我個人好有正義感，鍾意儆惡懲奸，想做正義嘅化身；但我又怕死細膽，唔敢去做警察，覺得做記者可以為人民出聲， 所以就去試吓，算係無心插柳！」
受訓後，林燕玲被調到無綫翡翠台，與當時同期出道的趙海珠及羅若安等人，齊齊擔正做主播，出道不久，更被捧為新聞小花，破例報黃金時段的《六點半新聞報道》。
「做《六點半新聞報道》，比做《香港早晨》或《晚間新聞》係仲大嘅榮譽！當時我係一個新人，可以報黃金時段，簡直係夢寐以求嘅事。我一直覺得係最勁嘅前輩先有得做， 發夢都估唔到自己都有份，但好可惜我報咗兩日就無做咯！ 因為嗰時已經有第二份工（now財經台）搵我過去，雖然佢哋有挽留，但我都堅持辭職！」
其主播形象深入民心，她坦言現時仍有不少市民在街上認得她：「到o依家仲會有人問我係咪邊個邊個主播，以前我會遮面唔認，o依家會大方咁認。」
早年趙海珠（左五）、羅若安（左三）及林燕玲（右二）等八位新聞小花，先後坐正主播之位：「以前我哋八個女仔好friend，尤其係羅若安，佢係個好有使命感嘅人！」
唔止得個樣
同樣都要上電視，不過轉工後再也不是報新聞，而是講財經，還要作現場直播，對於毫無財經知識經驗的她來說，這個跳板未免跳得太遠。
「我由細到大都好怕醜，連講嘢都會面紅嗰隻，唔好話要我做主持講財經，我連股票都未買過，只係o靚妹一名。呢個挑戰真係好大，但人哋既然畀得機會我，我梗係捉住，佢哋都信我咯，我有咩好怕？」
網上不時會看到有女主播講錯說話，或偷食餅乾的蝦碌片段，林燕玲笑言自己有睇過，不過自己卻是「零蝦碌」。
「我個人好嚴謹， 去到主播枱係唔會帶手機同食嘢，加上嗰時我咁細個就去到咁高級嘅位（首席主播），做事要更加小心，唔想畀人話，所以好大壓力。」
早前食肆「唐人館」開幕，（左起）林燕玲與李玉芳、老闆林建岳、唐英年及葉澍堃進行開幕儀式：「林生個人好爽快，我都係一個好直腸直肚嘅人，所以我哋步伐好一致。」
