劉佩玥 吸仔力強
劉佩玥（Moon）出道以來傳過唔少緋聞，包括：賭王公子何猷亨、周志文、黃又南、伍允龍等等，最近又有報道指佢（目及）中黃宗澤添。傳聞就話佢好會放生電，仲收埋收埋唔少「觀音兵」喎。
東姑唔知傳聞孰真孰假，不過，Moon同唔少男藝人真係玩得好埋吓，行街、食飯、睇戲嘅男性朋友多的是，異性緣堅係勁。
好似早排咁，東姑就見到Moon一女拖兩男，分別係周志康及翟威廉，去何文田一間餐廳醫肚；跟住，許家傑又載住彭慧中嚟埋，兩女三男約埋飯局。難得咁多異性喺Moon身邊o氹o氹轉，都唔怕被指係「兵」，又或者傳出緋聞。呢啲真正嘅友情，娛圈邊度搵呀？
Moon坐上周志康嘅私家車，同行仲有翟威廉，一女拖兩男，同車去開餐。
一班人食飯嗰陣，許家傑講嘢講到企晒起身，o氹到隔籬嘅Moon笑到合唔埋口。
