黃翠如與蕭正楠自兩年前拍劇撻着後，一直愛得高調，隨着翠如BB激變億萬千金，身份升呢，蕭正楠對女友更為着緊，新劇一煞科便孖住到韓國預支蜜月，慶祝拍拖兩周年。

日前兩人為新劇《幕後玩家》拍外景，由於戲內外同是情侶，攞正牌拍拖，蕭正楠如貼身阿四服侍翠如BB，惜女友唔爭氣，演技依舊麻麻，NG不特止，還大擺千金小姐款，幾乎玩殘全劇組。

當日一眾演員在圍讀劇本和試位，男友蕭正楠已拎住劇本跟翠如BB對稿，但她只顧住補粉，其他人嬲爆。

霸位攞飯

自ViuTV開台後，無綫收視備受追擊，即擺蕭正楠、黃翠如上枱，安排他們於新劇《幕後玩家》飾演情侶，企圖搶收視。愛得纏綿的二人相當受落，蕭正楠大讚女友着婚紗省鏡。晉身為「億萬駙馬」的蕭正楠，不但把口o氹女友，行動更實際，日前到粉嶺和合石墳場拍外景，自動波替翠如BB打點一切，甫到場便匆匆下車，打算幫女友霸定位化妝，惜張繼聰早一步坐低。眼見翠如BB只得罰企任由化妝師為她整頭，身旁的蕭正楠一臉不悅。

由於當日是重頭戲，蕭正楠跟其他演員在烈日下對劇本及試位，相反熱到溶的翠如BB只顧住妝容，手執名牌粉盒不停補粉，搞足半粒鐘。直至夠鐘放飯，蕭正楠又一馬當先為女友揀定啱口味的飯盒，繼而「同車」共食享受二人世界。

蕭正楠等埋女友收工，二人跳上由蕭正楠送給翠如BB的二手黑色Mini Cooper，當然由男方做柴可夫司機。

蕭正楠服侍周到，連飯盒都替翠如BB揀埋，讓女友食得安心。

雖然不斷NG，但貪靚的她最緊張是造型，不時叫人補妝。

搽完藥膏都嫌不夠，翠如BB竟對住小演員方向喪噴蚊怕水，龔嘉欣即伸手為小演員護眼。

升呢錫身

不但獲男友呵護備至，且又屬無綫高層余詠珊黨的翠如BB，備受力捧，雖然已升上一線地位，但演技麻麻，縱使蕭正楠在場教路，仍頻頻NG，她也未有歉意。

加上今時今日已是億萬千金，翠如BB份外錫身，因位處郊外開工，蚊患嚴重，拍到半路，被惡蚊咬到一撻撻，又熱又攰下，忟爆的她鏡頭外一言不發，做獨家邨；相反其他女演員龔嘉欣、劉佩玥、莊思敏等有講有笑，相映成趣。臨收工前，因見男友在拍攝，備受蚊叮的翠如BB，忍不住點龔嘉欣替她搽止痕膏，繼而又懶理小演員在旁也照噴蚊怕水，嚇得龔嘉欣即時出手保護小演員雙眼，令台前幕後側目，敢怒不敢言。