食得開心
要食得開心,除咗要菜式美味,環境、飯腳亦係重要因素。今次「Paco巨星飯堂」兩位嘉賓:陸詩韻(Sharon)同陳君宜(Qinnie),就先後為咗食得更happy而開設餐廳,親自監控品質外,仲為閨密提供多一個「蒲點」。
當然,享受美食嘅同時,又可以好似兩位嘉賓咁keep得到至fit體態,就更加完美。我就同佢哋喺Sharon開設嘅「Airisu Cuisine」,一邊品嘗特色嘅Fusion菜式,一邊暢談食經。
今次我同Qinnie(左)喺Sharon(中)所開嘅餐廳「Airisu Cuisine」,品嘗老闆娘有份監督嘅Fusion菜式,細說「食而優則開(餐廳)」之道,同食極都fit嘅秘訣。
要成功,Sharon事事親力親為,由搜購食材到試菜環節,佢一絲不苟地從中學習,絕冇偷懶。
從頭學習
講到投資七位數字去經營餐廳,Sharon話好多嘢都要由頭學習。「我會投資餐廳,最大嘅原因係我好鍾意食嘢,但係鍾意同要去run呢門生意,係兩回事,所以我就從每個細節上,慢慢學習。
「首先係對食材及菜式嘅設計,原來入貨要顧及好多因素,我會好認真咁mark低啲要點。我哋做日本同西式嘅fusion菜,兩樣嘢嘅要點都要記住,好似日本菜要確保食材嘅新鮮度,又要配合到師傅本身嘅刀法,真係缺一不可!」
Sharon一臉認真咁解說,可想而知餐廳已經係佢嘅baby。「我真係有咁嘅感覺o架!因為我都有份畀意見,所以有啲菜式係我同師傅嘅心血結晶。我哋要喺一啲基本嘅要求入面,諗方法去脫穎而出,又要加入西方元素,但係味道上又要互相配合,我o依家講就好似好易,但做嘅時候,真係好花時間。」
刺身串Tapas($118),選取西瓜皮與西瓜肉連接部分,再配上日本直送嘅新鮮三文魚及吞拿魚,於最頂部串上西班牙Parma Ham,層次分明。
火龍魚子凍湯($108)大廚選用時令嘅火龍果榨汁,加入忌廉作為基底,再加入加拿大海膽及西班牙黑魚子令味道更濃郁。
Tapas Mix($98)包括三個小食:日式烤冬菇用上西班牙芝士;第二款係香烤焦糖麵包,配上芝士、西班牙Parma Ham及香草。第三款為鮮味嘅香草燒虎蝦。
多元發展
除咗經營餐廳,Sharon仲百足咁多爪,打理其他業務,包括網店生意。「之前我一邊學做生意,一邊做演藝工作,活到老學到老吖嘛!尤其係現代嘅女人,更加應該要不斷增值自己。
「我由護膚用品做到內衣系列,啱啱就同一個歐美嘅內衣品牌合作,佢哋crossover我嘅設計,推出一個叫『Sharon’s Temptation』嘅系列。我覺得女人就算瞓覺都要靚,所以我對睡衣幾講究o架!重點係質料要舒服,我鍾意啲高衩、心口V形嘅款式,呢啲design可以令身形更靚。」
哈哈哈!Sharon努力擴展事業版圖,Qinnie就喺享受同囝囝親子樂嘅同時,兼顧餐飲事業。「同Sharon一樣,我都係鍾意食嘢嘅人,不過我就唔識煮嘢食。雖然係咁,我細個嘅時候,爸爸開過酒樓,所以我對點心都有啲認識,o依家餐廳入面有啲點心,我都有份構思o架。」
Sharon嘅內衣品牌,o依家漸上軌道,佢自己做埋生招牌,夠晒說服力!
上周Sharon以特別造型成為外國雜誌模特兒,係佢另一個突破。
Sharon同Qinnie呢對閨密,先後進軍飲食界,令佢哋多一個共同話題。
Qinnie開設嘅點心店,有精緻嘅卡通人物點心供應,甚有睇頭。
Qinnie熱愛游泳,佢除咗視之為「Keep fit工具」,仲係佢嘅親子活動,一舉兩得。
Fit爆秘訣
雖然兩位都係「愛食之人」,但係Qinnie同Sharon都保持到驕人身段,佢哋話冇秘訣,你又點會信吖?Qinnie話:「我每日都會游水嘅,大概會游一個鐘頭左右。因為我唔鍾意做其他類型嘅運動,只係游水我先會咁enjoy;湊仔都要消耗好多energy,我諗咁樣都幫我keep到fit。」
Sharon就話:「其實我冇刻意去keep嘅,只係會同朋友去做吓空中瑜伽,當玩吓relax吓。不過,我平時會行多啲路,仲有食飽飯嘅時候,會企耐啲,咁就唔會咁易有肚腩仔。
「我同屋企人住,每個禮拜都會有兩至三日,飲吓媽咪煲嘅湯水,清潤啲嘅就ok,反而補啲嘅,好似雞湯嗰啲就少啲,一個月大概一兩次啦!」