自從今年亞視執笠，四月新電視台ViuTV加入戰團，香港電視史上起了一場革命。

同樣起革命的，還有現年四十七歲的伍詠薇，去年她與無綫結束二十年的賓主關係，回復自由身，今年不但過檔有線拍攝綜藝節目《伍姑娘真識食》，又到內地拍攝清裝宮廷劇《美人香》賺人仔，脫離無綫，前路反而更廣。

「我好有觀眾緣，我呢一類型都好渴市o架，無人夠膽做嘅嘢我都敢做，好似吸氧氣嗰幕（○七年香港先生選舉中，戴氧氣罩扮暈），呢一行真係好少我呢啲怪女人，只要邊度畀到創意我，我就去邊度！」

敢怒敢言，勇於起「革命」，這就是伍詠薇。

曾出過唱片的伍姑娘指，有意再戰樂壇：「我打算出『發燒碟』，我唱到歌o架！賣唔賣得唔係重點，點都唔夠陳奕迅咁賣得o架啦，黐線！我將自己同陳奕迅比，哈哈！」

九九年，伍詠薇與現任丈夫練海棠於加拿大結婚，「我哋相識咗八個月左右，就強迫佢同我結婚，哈哈！」

練海棠於一三年為伍姑娘慶祝生日：「我呢個老公係無脾氣、斯文人、分析能力好高，幫我解決好多問題！」

與山聰破冰

沒有合約束縛，沒有立場顧慮，回復自由身的伍姑娘一身輕，不怕得罪「方丈」，更女俠上身，說訪問可無所不談：「講！乜嘢都講！無事不可對人言，我都無秘密嘅！」

她離開無綫，有指是因為無綫某高層惡言相向，令她反面離場，主動與無綫提前解約。「當時我係去傾一套電視劇，傾得好唔愉快，全世界估係咪有邊個高層得罪咗我，其實估錯晒！我無資格畀人哋得罪我，只係有一個同事，我同佢傾得唔愉快，得到好無禮貌嘅對待，我就決定唔接套劇！」

雖然已離開娘家，但關係依然，近年無綫劇種被網友指毫無新意，但伍姑娘卻大讚《殭》好睇，更提到已「割席」的契細佬陳山聰。

「《殭》我有睇晒，我覺得演員無問題，個組合幾新，片頭陳山聰（做殭屍）抹嘴嗰吓，我買山聰會跑出嚟o架，之後先到鄭嘉穎。第一眼我已經覺得山聰一定會爆，因為有新鮮感，但睇睇吓發覺個劇本唔係咁連貫，陳山聰咁重要嘅一個反派，應該要同鄭嘉穎有好多打鬥場面。」

以我認識伍姑娘的個性，還以為在戲中看到陳山聰的身影，會馬上熄機，皆因一一年與何超雲拍拖的山聰「玩出禍」，於生日當天致電給她玩絕交，令伍姑娘大感憤怒，隨即取消他的微博關注，並公開與他「割席」，暗指他見利忘義。如今卻對陳山聰演技有讚無彈，難道兩人已經破冰？

「我同佢根本就無嘢，只係一直唔見之嘛，哈哈！講真，我係睇戲（心態）嘅，總之見到山聰出番嚟（拍戲），就知佢發生咩事啦！佢同我就好似殭屍同不死人（指專門殲滅殭屍的不死身）咁，但佢喺《殭》真係做得唔錯，我好公平嘅，一路講山聰我都無口窒窒呀，哈哈！呢個世界係圓嘅，電視台都係得嗰幾個，你一定會遇番嗰啲人，呢啲仇又有乜好記？」

陳山聰早年因玩過界，令伍詠薇與他割席，伍姑娘笑言現與山聰碰面，也不會感到尷尬。

為有線主持《伍姑娘真識食》的她，指節目相當過癮：「有線雖然收視（比其他電視台）最弱， 因為觀眾要畀錢先睇到，但佢有創意，啱我性格，本來得十三集，但反應好好，o依家添多七集。」

脫韁的野馬

伍姑娘能不記仇，老公練海棠功勞不少。她笑指，老公脾氣好、分析能力高，時常為她中和生活上的苦事。「人哋多數話，夫妻要互相包容，但我唔係，一直都係練海棠包容我， 佢錫我錫到有時袁詠儀都鬧佢 ：『你唔好咁縱你老婆得唔得呀！你當佢女咁縱唔得o架！』呢個咪我嘅福氣囉！」

筍盤難求，更何況一個好老公？當年因黎姿牽紅線，認識從事廣告業的老公練海棠，猴擒的伍姑娘即時兩眼發光，相識一個月，馬上出招逼婚。

「我係烈女嚟，當年係我溝佢嘅，係我逼佢同我結婚！（九八年）十一月八號黎姿介紹我哋識，我第一眼就覺得佢正呀！十二月，我就同練海棠講我想同佢結婚，佢嚇咗一跳，話點會有女人一嚟就要同人結婚，不如訂婚先？我話好！我哋九九年二月一號就訂婚，仲叫埋我以前個男朋友出嚟做見證，之後我再話咁七月一號結婚啦，我哋嗰日就真係去咗加拿大結婚，前前後後只係八個月左右。」

女人年過三十，恨嫁在所難免，伍姑娘早於廿一歲就經歷第一段婚姻，與相差三十歲的前香港會計師公會會長翁江培結婚，但婚後十三日，前夫因心臟病離世，感受過喪夫之痛，仍無懼再婚，真的不怕掀起情傷？

「我係一匹脫韁嘅野馬，雖然我好癲，但我唔係壞。個天畀咗兩段婚姻我，第一段婚姻係翁先生，我細個好希望有個夢幻嘅婚禮，想行麗晶酒店條雲石樓梯，佢畀咗我；我又想要一個成熟穩重嘅男人，我又搵到喇，多謝個天！o依家仲要畀多一段婚姻我，我好多謝佢（練海棠），嚟緊七月我哋就結婚十七周年喇，估唔到我可以維持咁耐，哈哈！ 」

拍戲多年，仍未嘗試過攞獎滋味，不過伍姑娘指，不會模仿近日被網民推做視帝的王浩信，於戲中捱對手掌摑三十六巴。「如果我（劇中）被強姦七次，可唔可以都有呢個效應？哈哈！」

辣招抗小三

經常秤不離砣的二人，經歷過兩次七年之癢，伍姑娘亦高呼amazing，看來野馬都有被馴服的時候。

「（結婚）頭三年梗係好過癮啦，熱戀吖嘛！團火仲喺度！之後到第五年，啲火已經無咁『冚冚聲』；到第十年，所有浪漫嘢已經做晒，o依家我哋就好似坐喺老人院咁，哈哈，講笑咋！之後就開始細水長流，會更加關注佢心靈上嘅需求，當然身體上嘅（需求）都好多啦！哈哈哈！」伍姑娘扯高聲線，高八度笑着說。

老公一表人才，又是廣告界才俊，有索女埋身，實屬等閒事，想必伍姑娘定有「辣招」對付外來「小三」，怎料她只拋下一句：「有女埋身咪埋囉！」

她續說：「點都要畀我認叻先！我承認係有好多仔埋我身，我都好有魅力o架！佢係有好多女埋身，但天蠍座嘅男人係唔會話畀你聽， 所以我咪舒服囉！

「以前我有好多男朋友，細個直情做埋『緝私隊』，攞晒男朋友啲嘢嚟睇，何止睇手機，睇埋佢食飯啲單添呀！張單得嗰幾嚿水，同我講幾個人食飯？ 逼到佢（前男友）講（真相）為止！但o依家人大咗，唔逼喇，好煩啫！做人好似塊鏡咁，你只可以影響對方，唔可以改變佢，有女埋身咪埋囉，只要知道屋企個老婆最重要就得！」

結婚多年，我一直知道她恨有兒女，但奈何未有音訊，她直言已過了想要BB的階段。「啱啱同佢結婚時，狂（做愛）呀！有仔趁嫩生嘛，但生唔出，我十二生肖都追過晒，但有時女人就好似恆生指數咁，差唔多去到三十歲尾後，就覺得有無小朋友都無所謂。

「因為我都仲係一個細路仔，嗰時我問佢：『你介唔介意湊住我呢個細路仔，而我哋係無小朋友？』佢答我OK，我覺得佢好偉大，所以就決定唔要小朋友喇！」