在家千日好，倘若安樂窩是「內外兼備」，仲點捨得走？本港珠寶製造及零售商「冠玲瓏」老闆沈運龍（Aaron），家住何文田的三層複式連天台豪宅，內外面積合共四千呎，坐擁270度的維港海景，令過去愛搬家的他，終安定下來， 一住十五年。
「我好鍾意買特色單位，改變原本格局，將兩個單位打通，或者上下打通，變成一個特色單位。呢度嘅黃昏景係最靚⋯⋯我一直都有睇樓，不過暫時未有心水單位好過呢度，所以仲未搬得郁。」
花心思為自己的家添上特色，沈運龍站在打通了的巨型客飯廳中，一臉愜意。

置身長方形的客廳和飯廳，以白色為主調，加上兩盞大水晶燈作襯托，提升一室格調，沈運龍笑說：「淺色令到個人開朗啲，深色就會老一啲，我要保持住年青嘅心態。」

特色居所

沈運龍居於九龍何文田半山的三層單位連天台，當年他自己入則申請，將上下單位打通，打造成罕有的特色複式單位。
「我想住市區，要有全海景，但又想有住獨立屋的感覺，有花園和天台，九龍區唔係咁易有。我之前住過香港、新界，搬嚟呢度，係方便個女喺九龍塘返學。」
充滿創意的他，旗下的冠玲瓏鑽石藝術博物館，當中十件是健力士世界紀錄的鑽石珍品，包括「最多寶石」的結他、馬桶、手袋、唇膏盒等，均出自他的構思。他又曾親自打造過不少特式單位，再轉手後獲利二至三倍。
他一家在這裏住了十五年，因為太喜歡，所以捨不得搬，但就多次全屋裝修，增添新意。他將最低層劃分為客飯廳和開放式廚房，又打造了一個吧台區，存放了各式的紅白酒和酒杯，以便宴請親朋，「我平時好少飲酒，都係朋友來至一齊飲，好多朋友知我呢度有個靚景，仲專登約埋一齊嚟欣賞。」

他在疫情期間，自學打鼓，他直言只要有節奏感就可以學識，這天更即席表演。

駱駝團隊購自沙地阿拉伯，大約三美元一套。

露台面向270度海景，是甚為罕有的靚景，地上的嵌入式魚池，同樣是焦點所在。