公然鬧法官「狗官」　曾健超支持者　涉藐視法庭

佔領運動期間涉向警察淋有味液體嘅公民黨成員、註冊社工曾健超，本周一喺九龍城裁判法院，被裁定一項襲警及兩項拒捕罪成，被判入獄五周，准以現金三百元保釋等候上訴。部分聲稱係曾健超嘅支持者，聞判後竟然在庭內發出連串噓聲，仲大鬧法官係「死狗官」、「狗官最無良」、「有無搞錯」等；代表控方嘅副刑事檢控專員及負責案件嘅警員，更一度被困喺法院逾半個鐘，要警方開路先走得。而庭外亦一樣混亂，五十多名曾健超嘅支持者知道判決結果後，即情緒激動，高呼法治已死，一度與反對人士對罵。

裁判官羅德泉判決時表示，被告事發時對警員動粗，將警員當成「出氣袋」。佢續指出，前線警員只係按指示執行職務，法庭有責任保護佢哋，縱使被告同警員並無實質身體接觸，但佢用有異味液體潑向警員，是對警員極大的侮辱和挑釁，近似向警員吐口水，過往都有判處監禁嘅先例。

就公眾人士喺庭上辱罵裁判官係「狗官」，執業大律師陸偉雄指出，有關字眼帶侮辱性，有機會干犯《裁判官條例》。此外，法庭亦有權控以藐視法庭罪作出起訴。

社工出身嘅曾健超有可能因此案，被社工註冊局吊銷牌照，註冊局委員嘅公職都可能無埋。

曾健超涉嫌佔領期間向警察潑有異味嘅液體，本周一被裁定襲警及拒捕罪成，入獄五個星期，暫准保釋等候上訴。

曾健超支持者知道結果後，批評判決唔公道，入內旁聽嘅支持者更大鬧裁決官「狗官」，涉嫌藐視法庭。

涉嫌襲擊曾健超嘅「七警案」，亦將於六月一日開審。

資深大律師湯家驊指該批支持者在庭內辱罵裁判官，相信已構成嚴重的藐視法庭，一般可被判監數天至數星期。律政司發言人回應指，司法機構將就事件徵詢律政司意見，以決定是否採取進一步行動。

曾健超今年初獲選做社會工作者註冊局委員，並擔任轄下「專業操守委員會」召集人。不過佢上任唔夠四個多月就被判監。據悉，以往並無註冊局委員在任期間犯事坐監，但根據《社會工作者註冊條例》，曾健超今次罪成，行政長官可以行使酌情權，將佢委員一職懸空。

條例亦講明，社工一旦觸犯咗可被判坐監嘅罪行，有損社工專業，註冊局有權唔接納佢續牌社工申請。如果曾健超被投訴專業失德，註冊局經內部聆訊後成立嘅話，他亦有機會被永久吊銷社工牌。曾健超就表明即時上訴，話法庭判決法庭了斷。