香港人喜歡標籤，尤其對城中筍盤、富二代等名詞，特別關注。

家族身家八十億的三十四歲莊士集團太子爺莊家彬（Albert），名副其實屬「至筍Package」。他出現於娛樂版的次數，比在財經版的還要多，皆因去年被指父親莊紹綏棒打鴛鴦，與拍拖九年的傅明憲分手後，更火速搭上相識十年的內地新歡程新惠（Grace）。

對於舊戀情，莊家彬沉默數秒，苦笑說 ：「都無得唔認喇，唔多唔少都係因為家庭壓力（而分手），係幾可惜嘅，都好多年喇⋯⋯以前想盡量低調，但其後發現愈唔講，傳媒愈chur住你，所以就索性承認（同女友程新惠嘅戀情）！」

撕下標籤，這個筍盤，亦只如你我般，相信緣份。

（左起）二弟莊家豐、莊家彬、父親莊紹綏、三弟莊家淦及胞妹莊家蕙，於家裏影大合照：「我哋幾兄弟姊妹關係幾融洽，我好少同細佬鬧交！」

去年年尾母親賀碧諭（中）生日，（右起）莊家豐、莊家彬、莊家淦、莊紹綏、莊家蕙及其丈夫Neville，一家人於酒店內舉行生日派對，慶祝母親生日。

結婚對象

莊家彬近年緋聞多多，或多或少是因為與傅明憲分手後帶來的餘波效應。過去他對戀情一直謹言慎行，但自去年與新歡程新惠撻着後，則一反常態，大方談及戀情，難免令人費解。

「唔係唔肯講，而係成個情況好尷尬，有時會驚我屋企人嘅諗法，又唔知佢（傅明憲）屋企人點諗，同埋以前有段時間，好多傳媒都chur住佢， 好想知佢嘅嘢，咁我哋想低調啲，咩都唔講，o依家先明白，我愈唔講，（傳媒）愈會問。」莊家彬解釋說。

直認因家庭壓力而狠斬九年情的他，坦言揀女友一定要符合父親要求，「呢個係一定，我係個好傳統嘅人，伴侶要過我爸爸媽媽嗰關，佢哋接受先會結婚。爹哋想（我女友）係亞洲人、身家清白、性格好，最緊要係孝順。」

那麼三十一歲、從事節目發行的北京新歡程新惠，是不是一隻腳已踏入豪門？「我同佢已經識咗十年，拍咗一年拖。上年因為我散咗之後去多咗台灣，佢（女友）以前又住喺台灣，所以同佢見面多咗，再熟絡咗，最後就一齊。我哋仲了解緊，始終做朋友同做女朋友係兩回事。」

舊愛傅明憲曾指，跟他拍拖九年來從未見過其父親莊紹綏，更未曾同枱食過飯，現任女友又有否見過其父親？

「未，但準備緊！爹哋有催我結婚，佢哋都想快啲抱孫，但結唔結要睇我ready未，睇我另一半係唔係適合。我好少咁快帶女朋友去見父母，我覺得見家長好似係一個commitment（承諾）咁，要同佢（女友）行去另一個step，所以我唔鍾意識咗個女仔一陣，就帶畀父母睇。我都未認識呢個人，就畀咗承諾人，唔係咁好，（見家長）係一件好隆重嘅事！」

長期中港兩邊走的他說：「如果唔係我父母住喺香港，我就會去北京或者上海住， 因為內地真係有好多發展機會。」

喜愛戶外活動的他，今年年頭到日本二世古滑雪，「我一年大約會滑兩次雪。」

緋聞解畫

去年十月，莊家彬被本刊拍到出席飯局，左擁右抱王秀琳和退選巨咪港姐沈子妤，更載王秀琳返香閨，花花公子形象浮面，他卻解釋：「嗰次係一個朋友聚會，當日我遲到，所以坐咗喺個女仔（沈子妤）隔籬。事後我諗番，嗰個女仔另外再帶多個女仔嚟，係無人識嘅，坐我對面，我完全無留意到。最後可能係我飲咗啲酒，又可能係角度問題，其實件事唔係咁！」

他直認，事後其母賀碧諭、胞妹莊家蕙及女友，均對此感到不滿。「我老竇無話我，反而係我阿媽、細妹話我，覺得唔係咁好。女朋友都有話我，話我份人唔識拒絕人，唔識say no，有時做人太gentlemen，唔識避嫌。但我覺得，識我嘅人都知我唔會咁做，佢哋都知我拍拖次數好少，每次都好長，我唔係啲周圍溝女嘅人。」

做了封面人物，莊家彬聲言被嚇怕，以後會避免載單身女子回家。

「相比起我有啲成日上報紙嘅朋友，佢哋道牆set到好厚，唔會同唔識嘅人去食飯或飲酒。但我唔係，我覺得自己無呢個（新聞）價值，唔會有人想影我，亦都唔想畀人感覺自己好大支嘢，但經過呢幾次後，我諗自己都會反省下！」