魯庭暉：凡事多面睇兼要懂容

ViuTv 自4月6日正式開台以來，實況娛樂節目《跟住矛盾去旅行》、《G-1格鬥會》等這些真人騷口碑及收視都理想，有些觀眾反映節目內容既新鮮又有趣；「新鮮又有趣」在現今香港電視行業可謂鮮有所聞，以往兩大免費電視台總是被批評節目欠新意，內容更經常「炒冷飯」。今期ViuTv董事兼行政總裁魯庭暉（Lofai），向陸叔娓娓道來自幼如何開始培養創意，長大後又如何把創意應用在工作上。

陸：Lofai，首先恭喜你哋ViuTv喺4月成功開台，觀眾對你哋炮製嘅節目反應好好，我想問你從小係咪已經鍾意搞創作？

暉：陸叔，應該講由細到大我都好享受「唔明白」嘅感覺，時時都會跟住好奇心去接觸一啲我唔識嘅嘢，我記得幼稚園、小學嘅時候，放學都會陪阿媽去買餸，阿媽去街市我就會去圖書館睇書，由於我日日去，所以好快就睇晒兒童部嘅書，之後惟有要走去睇社會科學嗰類大人先睇嘅書，試過見到本書係講人嘅心肝脾肺，我覺得好奇，更質疑點解睇唔到自己嘅心肝脾肺，當然嗰時太細無諗過係因為有皮膚遮住，哈哈。

陸：因為咁你哋會破格去做一啲有別於傳統又另類嘅電視節目？

暉：我睇唔通又諗唔明嘅嘢，會令我好奇想去深入探索同發掘，特別啲又另類嘅電視節目，我相信喺電視機前係會有我呢啲觀眾想睇。

陸：你咁細個就已經咁有求知欲，我諗你應該讀書都唔會差o架啦，知道你大學嘅時候係讀傳理系，之後畢業又去咗牛津讀社會學，不如講吓你讀書嘅經歷吖？

暉：我由中學到大學生涯都算幾特別，升上中一因為阿媽想我讀間近屋企嘅，所以就去咗黃竹坑一間較普通嘅中學，中二先轉去讀皇仁，一路讀到中七，我中三、四嘅時候係讀理科嘅，去到升中六就覺得自己啱讀文科多啲，但皇仁嗰陣係唔畀轉科，於是我咪想喺外面搵間中六、七肯收我讀文科嘅中學，又唔知係咪整定喎，準備去嗰間中學嘅時候，就發現唔見咗我張成績單。陸叔，你知啦，除咗原校邊仲會有學校收一個唔見咗成績表嘅人，咁我咪唯有返去皇仁讀中六，後尾喺回校途中發現我張成績表，原來跌咗喺皇仁對開嘅「叮叮」路軌度仲被電車碌緊添。

ViuTv董事兼行政總裁魯庭暉讀大學時轉過科，之後又去過世界不同地方工作，接觸很多不同圈子的人，因而學懂凡事要多面睇兼要懂包容，令他可製作更多元化節目。

陸：似乎你經常都喺轉變中渡過，入得到中大傳理系，高考成績都應該唔錯o架？

暉：哈哈，我高考除咗語文科考得唔錯之外，化學、生物同物理都係拎E咋，當時呢個成績係博唔到入中大傳理系，我係入咗中大生物系先，再諗住之後申請轉去傳理系，入咗中大生物系後，先發覺轉系比我想像中困難，轉系第一個條件仲一定要喺本科考前幾名，嗰時我有幾個同學係本身好鍾意讀生物，佢哋高考生物係拎A。

陸：仲有無其他條件要符合到先可以轉系？

暉：第二個條件就要令到新聞系想收我，為咗顯示自己真係好想讀新聞系，就要諗辦法搵吓有無相關嘅實習做，新聞系嘅實習通常只會請返本科生。陸叔，不過皇天不負有心人，我最後入到商台嘅一個創作訓練班，拎到佢哋嘅推薦信，之後就成功轉去傳理系。

陸：「有志者，事竟成」，呢啲精神值得我哋大家學習。

陸：喺讀新聞系嘅過程中最大得着係咩呢？

暉：我諗應該係識到KC，佢係我大學嘅一位講師，平時作風雖然好低調，但思想其實好狂野，做起實事嚟仲可以好爆添。我讀完牛津返嚟之後，就去咗佢間廣告公司做過三四年，由於係一間細公司，公司事無大小都要一腳踢，雖然辛苦但學識咗點去執行自己嘅創作。

陸：我知你哋當時都幫新地、九巴做過廣告，出嚟效果亦唔錯，不過講返轉頭，你讀完中大之後，點解會去咗牛津讀碩士？

暉：大學畢業後我就申請獎學金去讀牛津，去嘅原因係我想見識吓，睇吓全球排行第一嘅英語大學係咪真係咁勁。喺讀牛津嗰一年幾真係無令我失望，教授要我哋喺上堂前嘅一個星期就要睇好晒大量嘅閱讀（readings），跟着要寫一篇贊成或反對教授預設議題嘅文章，呢種學習模式難在我要喺短嘅時間內消化大量閱讀，仲要從當中抽出我想要嘅論點。

陸：呢種上堂學習嘅模式喺香港就未必行得通喇，哈哈。

陸：你之前分別去過上海、英國同美國做嘢，係咪因為你鍾意見識唔同世界嘅地方？

暉：陸叔，純粹因為我想做就去做，我一般只係會睇件事嘅本質，去上海係因為好難得可以入到W&K呢間幫Nike做廣告做得好好嘅公司，喺嗰度我學會點做包装（packaging）同數碼行銷，就算跟住去到英國我都係做返digital，之後被挖角去咗美國Apple做，每次轉工都係因為我想試吓唔同嘅嘢。（待續）