每年三月，都是香港Art Basel的季節，全世界的藝術收藏家都爭相來港朝聖，然而十幾廿年前，真正關注藝術的，卻是寥寥可數。

已故麗新集團創辦人林百欣女兒林明珠（Pearl），可算是「藝術搞手」的表表者，當年她無懼父親反對，義無反顧醉心發展藝術，並創辦畫廊，由香港推向國際。問到父親可有滿意她的成果，她即提高八度、斬釘截鐵否認：「梗係無喇！佢到臨死嗰一刻都唔接受我去搞藝術，當年佢仲要送我去上海起樓（做住宅項目），但我唔會expect（期望）其他人會明白我做緊啲乜，我只係為自己想做嘅嘢而做，我開心就得！」

隨心率性而行，正是林明珠所行的藝術之路。

林明珠指定叫老友雷禮權幫她拍攝訪問照片，「我最憎就係影相， 我同雷禮權識咗好多年，佢同我影相特別快，半個鐘就同我影咗四十幾張。」

去年她（右）有份參展香港Art Basel，場內擺放了英國著名藝術家Yinka Shonibare立體作品。

邊個識林百欣

林明珠貴人事忙，這個訪問我足足約了一年才成事，她甫坐下即說：「快快快！我要四點前做晒訪問，我之後仲有嘢做！」說話急速，聲線沙啞洪亮，林明珠說話霸氣十足，連我也要忌她幾分。

十一歲到英國留學，其後應父母要求，放棄進修藝術，改為修讀金融及法律系碩士，畢業後到上海負責策劃住宅項目。不過，個性我行我素的林明珠，九二年終於藏不住其反叛因子，不理父親反對，於香港開設對比窗藝廊，一二年更於中環開設Pearl Lam Galleries（藝術門)，全面發展藝術。

「我好細個就已經鍾意畫畫同藝術，當初我出嚟做art，啲人都笑我點解唔同老竇打工啫，因為佢哋最唔鍾意一個有錢、有家底嘅人嚟搞藝術！」

林明珠澄清，她從來不以「林家大小姐」自居，更不會以「林百欣女兒」之名，進軍藝術界。

去年，林明珠（右）與姪女林煒珽一同出席葡萄牙著名當代藝術家Joana Vasconcelos的作品、巨型藝術裝置「八面靈龍」（Valkyrie Octopus）於澳門舉行的展覽。

經常到處飛的林明珠（右），去年十月與友人齊齊到歐洲出席宴會，盛裝現身的她，盡現貴氣。

「我喺英國搞art嗰陣，根本就無人識得我老竇係邊個，就算講咗，人哋只會答你what the hell！Who cares？ Who knows邊個係林百欣？識得你咩，而且邊個會想畀人講話係邊個邊個個女，打死我都唔會講喇！當年就算（香港、中國）有人識（我老竇），我同一本雜誌做訪問，佢哋連寫我老竇個名都寫錯，哈哈，笑到我吖！啲人信我，唔係因為我係林家，而係因為我喺呢個圈（藝術界）已經好耐。」

兩父女雖然臭味不相投，但林明珠指兩人亦有相似的地方，「佢係一個好強、好勤力嘅人，一日到晚都係咁做嘢，個腦無停過，但細個對我唔嚴格，反而係我阿媽先對我嚴，會用雞毛掃追住我嚟打，我老竇仲叫我快啲走！所以我阿媽成日話我老竇太縱我。o依家我終於明白，佢真係好鍾意做嘢，好似我o依家咁，但我覺得我唔係喺度做緊野 ，所以完全唔覺得辛苦，我好enjoy！」