23:45 臨散檔轉去後門再與班阿Sir玩吓。

00:15 返回大樓前狂歌熱舞。

02:00 過海去花園街夜蒲兼醫肚。

03:45 無睡意繼續漫步旺角街頭。

05:00 鬥爭一晚發展為「革命鴛侶」。

06:30 天快亮依偎街角夠浪漫。

呢期最熱門名詞是「八十後」，好多人將上周五立法會外搞抗爭嘉年華的一眾反叛青年統稱為「八十後」，其實有啲搞錯，班友裏面又分成幾批人，行為模式與玩法並非一樣，若要深入了解，必須近距離觀察。

在示威人群之中，有二十幾人熟口熟面，原來元旦大遊行留後衝擊中聯辦的一役，他們就站在前排又推又撞又尖叫，表現最激。今次反高鐵，他們又在網上吹雞聚集立法會外，準備再玩鋪勁。本刊調查組記者（時事狗仔隊）出於好奇心，當晚以他們為目標，深夜貼身追蹤了七個鐘，過程所見都幾有趣。

財委會散會是晚上十點幾，但班友興致未盡，唔想個party咁早完，於是繼續留在現場搵嘢玩。是晚與陳巧文一齊的二十幾人，包括浸大學生阿豪（因愛玩結他故亦叫「結他仔」）、教院學生阿詩、理大副學士生阿樂、HKU SPACE學生阿Wa及旅行社職員Jaco等，到接近零時忽然轉移到立法會近遮打道的另一邊，當時差人仍然架起鐵馬留守，班友一字排開同差人對峙，篤口篤鼻做出無聊動作，並猛彈結他跳吓跳吓，幾次想找缺口突破防線，但差人不動如山，班友擾攘了二十分鐘，見再冇乜好玩，便返回原來的集合區域。

此時已過了午夜十二時，他們愈玩愈high，全無倦意，繼續在集會內狂歌勁舞，享受示威後的餘興，差不多又玩了成粒鐘。到一點左右，眾人終於興盡散檔，但年輕人邊會咁早瞓吖，於是分頭過海去花園街繼續蒲。

此時花園街仍熱鬧如白晝，班友搞咗成日，肚仔已餓，齊齊走入通宵營業的標記樂園醫肚，二十幾人佔用四張大枱，嘻嘻哈哈並攞出副啤牌玩「鬥地主」，不知幾高興。

到凌晨三時，班友飽餐一頓十分滿足，但仍然鳥未倦不想還，行到豉油街附近的公園仔，即興入內席地而坐談天說地，回味吓包圍立法會之抗爭滋味，傾傾吓又過了成粒鐘。

此時已過四點，有人頂唔住眼瞓話要走，大夥終於散隊，但個別成員做慣夜鬼，見未到天光，分批繼續在旺角周街逛，其中「結他仔」阿豪同教院學生阿詩似乎已結成「革命鴛侶」，孖晒頭在太子道一帶徘徊，又入「七仔」攞幾份報紙睇示威報道（只睇不買，慳番六蚊），兩人漫步黑夜旺角街頭，在寒風中坐在行人路邊依偎，十分浪漫。

此時東方漸亮，阿婆阿伯已出來晨運，兩人終於興盡說拜拜。這晚夜由激情到浪漫共十幾小時，憤青們過足了癮，分頭回家瞓大覺，下周五再嚟過。

線人話，呢批憤青全部透過網上聯繫，同政黨冇乜關係，甚至對班政黨大佬好睇唔順眼，例如阿Wa曾經入過社民連，但大半年就退出，因為覺得大佬們有私利動機，跟唔過，不如我行我素自由行動。所以他們在過往行動絕不受政黨指揮，自己鍾意點搞就點搞，連差佬都好難捉摸。

至於鼓動菜園村村民出來鬥爭的本土行動成員，以保育人士為主，與上述的憤青是另一班人，他們思想雖激進，但行動就溫和好多，只是搞「公民抗命」，不會郁手郁腳粗暴衝擊。下星期如果財委會通過撥款，估計他們亦不會爆出激烈行動，反而網民憤青玩啲乜就要提防。

謝偉俊怒斥「拉布」 「佢哋好虛偽！」

泛民班友上周五玩「拉布」，拖延高鐵撥款表決，謝偉俊坐在幾個泛民議員附近，見到他們頻出茅招，實在睇唔過眼，於是企起身直斥其非。他的發言播出來，其辦事處立即收到辱罵電話，職員驚有人對他不利，提醒他離開立法會時小心。

本刊記者問阿Paul驚唔驚，他說：「未驚過！」講到泛民議員當日的「拉布」行動，他就愈講愈㷫，怒氣仍然未消。「我極之不滿班泛民議員嘅做法，其實高鐵計劃好多技術問題之前已在立法會討論過，議員當時唔問，依家就挖出好多虛無飄渺嘅問題問完又問，又冇誠意了解答案，有人問完就出咗去，根本冇聽官員點答，明顯係拖延表決，呢種手法好唔負責任。」

阿Paul說：「毓民等擺明車馬直言玩拉布，願意承擔後果，仲好啲，反而湯家驊同梁家傑等做到好似探討問題咁，其實係玩拖延，就好虛偽。佢哋濫用程序，唔尊重大多數市民嘅意見，又耗費公帑，實在太離譜！」

他準備本周五高調聲討這些議員的劣行，揭開他們的真面目，至於點做法，他暫時賣個關子，到時才說。

阿Paul未驚過，準備本周五高調斥責泛民議員不負責任。

卿姐如再「鬆章」 建制派將郁手

泛民兩度在財委會玩嘢，主席卿姐好明顯故意「鬆章」，冇完全執正嚟做，令議員可以問完又問又再問，討論沒完沒了。政圈線人話，卿姐如果本周五再咁玩法，部分建制派議員好可能忍唔住搞出個不信任主席動議，實行拉佢落馬，而更多市民亦會因為卿姐太偏幫反高鐵人士，對佢反感。卿姐應該衡量利害，為免付出代價，應該揸番正會議規則，畀撥款動議表決。

線人指出，卿姐亦係聰明人，相信佢亦知再咁拖落去大家都輸，玩到這一步已差不多，故周五會議應該會揸緊啲，若然如此，表決有望在周末前進行。