說起來，其實是頗吊詭的。

同一個黃秋生，這邊廂數個月前才在《梟雄》中，以「麥兜校長」腔演繹重情重義的「天哥」喬傲天；接着，又在《萬千星輝頒獎禮》大熱門當上視帝，兼成為了香港首位電影、電視和舞台劇「最佳男主角」的大滿貫演員；轉個頭，他又返回舞台上，在舞台劇《狂揪夫妻‧二度勁揪版》中，再次當他的小男人「Michael」，跟蘇玉華、甄詠蓓和潘燦良，繼續鬥戲炒大鑊，徹頭徹尾是個公認的好戲之人。

然而，在另一邊廂，他卻是被導演唾罵和少數unfriend的行內人，又是某些人眼中的賣國賊及佔中搞手，最愛提倡港獨、台獨，又愛分裂國家。

一個時空，兩個世界，秋生周旋其中，他很清楚哪邊才是自己的現實。

「嗰個導演？喺我個宇宙一早冇咗呢個人啦！大家基本上係唔識嘅！」

「嗰班盲毛？我只係見到佢哋嘅可悲同貧窮！佢哋講嘢冇邏輯又無聊，成班友仔都傻嘅，簡直侮辱緊我嘅智慧！」

即使他選擇為現實的那個世界，被另一個世界影響到他整年來沒有導演找他拍戲，但他卻沒有後悔曾經所發過的聲音。「如果再嚟一次，我可能都係咁樣o架！因為對我嚟講，人格、尊嚴、良知都好重要！我要頂天立地、企喺度，就預咗會被人攻擊、侮辱同誤解，我做人到o依家，都對得住自己，對得住我阿媽，對得住我個仔！」

這就是秋生的宇宙。

上月《萬千星輝頒獎禮》成為了視帝，黃秋生說，「本來冇壓力，去到現場，我真係有少少驚。」

成為首為香港大滿貫演員，英皇老闆楊受成（右二）等人為他（右三）設宴慶祝。

大滿貫

黃秋生向來予人形象英明神武，誓估不到，原來上月他出席《萬千星輝頒獎禮》，竟然會怯場。「喂，佢哋搞到又網民又呢又路，好似好有公信力，好多人注意咁，我去現場見到：『嘩！乜搞到咁大呀？』有少少驚驚哋o架！如果我攞唔到……其實都唔係醜嘅，即係……硬係會有少少『哎吔』咁囉。」

憑《梟雄》的「天哥」當了視帝後，他同時亦成為了香港首位同時擁有電影、電視和舞台劇「最佳男主角」獎項的大滿貫演員。「係囉！巴之閉呀！三元及第喎！好犀利呀！」他得得戚戚地說。

「下次都係時候攞奧斯卡啦！哈哈哈！嗰陣John Lone（尊龍）做『冰人』（八四年《冰人四萬年》），唔使講嘢o架嘛，咁佢都有攞獎啦（八八年憑《末代皇帝》奪金球獎男主角獎）！等我都呃番套西片返嚟，做個『盲公陳』、啞嘅，連英文都唔使講呀嘛！」

呃乜鬼，查實，去年《星球大戰》幕後已曾主動跟他接洽過了。「係有傾過吓咁啦，但我要演舞台劇，冇時間呀。」問到找他演哪個角色，他語帶輕挑地謂：「戴面具、見唔到樣嗰啲啩！哈哈哈！咁面具做到嘅嘢，攞唔到奧斯卡o架！算啦！除非我唔戴面具，都做到面具嘅效果啦！哈哈哈！」

那麼，又可有因為大滿貫加片酬呢？「加乜嘢片酬啫，我都冇片拍！有先算啦！」