水，變化萬千，也靈巧萬分。
袁偉豪一度欠缺的，就是如水般玲瓏。
數度被網媒抨擊，他會悉數還擊，而且100%會被網友的負評圍剿，屢試不爽。最新近的，是數月前來自同一網媒，暗寸他未達當藝訓班導師的水平，他即一竹篙式還拖稱：「我欠咗你哋班傳媒？」
睇字也感受到火力之猛，但沉澱過後，袁偉豪直言：「導師，只係一個名詞，我入咗行廿五年，其實都係同啲學員分享經驗啫，但一見到篇報道拉到我張相咁大，我就有咁嘅反應囉。」
人生畢竟需要一點激情，當中產生的能量，正、負皆有，四十一歲的袁偉豪，就透過音階「放負」。「喺最唔開心嘅時候，一放假我就會匿埋喺屋企，唔想見人，我老婆都唔係廿四小時都開解到我，所以我就喺我嘅工作房，做音樂去轉移視線，唔去諗啲唔開心嘅事。」
負極轉正，袁偉豪還創作了一些歌曲，除了已公開的〈馬路英雄〉，還有其他蓄勢待發，電結他的和弦，還令他看開了，「我比較感性，又情緒化，要搵一個出口去釋放自己，係有啲難度，o依家搵到嘞。望番轉頭，其實當日嘅唔開心，只係好小事，反正都會過去嘅。」
已過不惑之年，多走一點「水之道」，才可把事物看得更通透。

 

 

他說，心情欠佳時，連炮製出來的麵包，也不能入口；但圖中的牛角包，則是袁偉豪的得意之作。

在途上

袁偉豪的IG名稱，是「benontheroad」，即「袁偉豪在途上」，其人生路上的風景，跟閣下的大同小異，同樣包羅萬有，近來最令他雀躍的，是其「BB」的誕生。
「真係開心o架！因為〈馬路英雄〉呢首歌，我嘅參與度好高，melody係我逐粒音揼出嚟，加埋填詞、編曲、監製都係我，所以真係好似我嘅BB咁。尤其係Mixing，真係做到令聽者可以感受到，喺馬路上面揸車嘅危險同暢快，做完晒首歌，係好有滿足感！」
他不諱言，即使演了這麼多年的戲，仍未忘記多年來的音樂創作夢，「我一直都有寫歌，而且嚟緊我仲打算繼續出歌o架，又有一隊Crew去幫手，我想做多啲成績，俾大家睇到我係有誠意嘅。」
要說袁偉豪的音樂路，就要來個回帶Mode，他的夾Band歲月，於廿多年前已開始，「我日日就喺韋啟良（電影配樂人）嘅Studio玩，同小龍（陳國坤）、柯有倫（小黑兒子）、羅金榮夾Band。羅金榮係黃子華嘅唱片監製，於是我哋又去過子華神嘅Band房玩，玩到佢叫我同小龍，喺《一蚊雞保鑣》客串做收數佬。」
一路走來，袁偉豪輾轉間參加了「港男」，繼而憑藉演戲，留下名字。

入行廿五年，袁偉豪一直都有其音樂夢，由年輕時跟柯有倫、陳國坤夾Band，到今年推出的單曲〈馬路英雄〉走唱作人路線，他的追夢步伐未曾停止。

陳山聰是他在圈中的另一位知己，「同山聰一齊跑步，大家都睇住對方成長。」