15個春夏秋冬 翁嘉穗
十五個春去冬來，誰可活得更自在？一九九七年港姐冠軍翁嘉穗（Virginia）可以。
她於一九九九年下嫁七海化工集團主席鄔友正，並於二○○○年誕下兒子組織幸福家庭。經過十五個年頭，今年四十一歲的她決定「從頭開始」，再度懷孕，早前更榮升第二任媽媽。
「其實我同丈夫一直都想有BB，因為想囝囝有個伴，所以呢胎係喺計劃之內。最初我唔想兩個小朋友年齡太接近，因為我想每個都有full attention（充分的重視），不過相隔十五年又真係長咗少少，但係我哋一家人都好開心o架。」
一邊說着，Virginia臉上的幸福笑容愈見燦爛，這一刻，她既幸福又自在。哪管多久，為人母的喜悅，從來不朽。
四十一歲的翁嘉穗，坦言兩個就夠晒數，不會再追生B女了。
從頭學起
在加拿大UBC大學（The University of British Columbia）經濟系畢業的翁嘉穗，是我認識了二十年的好朋友。還記得九七年夏天的一個晚上，在電視機上看到翁嘉穗登上港姐冠軍寶座，兩年後她就跟七海化工集團主席鄔友正（海馬牌床褥創辦人）成婚，千禧年誕下長子Jason後，她一直專心相夫教子，過幸福少奶奶生活，只是偶爾出席慧妍雅集活動和時裝秀，成為社交圈的名媛。最近更使人驚嘆的是，十五年後她再度懷孕並誕下第二名兒子，身邊朋友也替他們高興。
翁嘉穗為丈夫鄔友正於千禧年誕下長子Jason後，一直希望再有小朋友，過了十五年，二人終於如願以償。
翁嘉穗笑言，兩個半月大的細仔Kaspar，是個愛吃的小寶寶，吃奶速度快，身體亦大得快。「佢o依家已經要著半歲人仔嘅衫喇！」
產後兩個月已回復昔日身段的翁嘉穗，甫坐下即笑說：「呢啲都係餵人奶嘅功效，o依家我每隔兩個鐘就要餵一次奶，所以想瞓都唔得，點會唔瘦呀？」談到小兒子的名字Kaspar的意思，她則稱：「中文名我哋仲諗緊，英文名Kaspar嘅靈感，係來自我自己個名『嘉穗』嘅英文譯名『Ka Shui』嘅『Ka』，意思係『Secret Treasure』（神秘的寶藏）。」
相隔十五年後再「湊仔」，翁嘉穗坦言一切要從頭學過，「生第一胎嘅時候，我只係得二十幾歲，身體復原自然比較快，生呢胎我都四十一歲，屬於高齡啦！而且相隔十幾年，有好多照顧新生BB嘅事項我都唔記得晒，o依家我就好似一個新手媽媽咁。
「而且現今科技先進咗好多，以前照超聲波，只係得平面嘅，o依家就有4D。BB用品又層出不窮，好多嘢以前我都未用過！例如o依家有唔同嘅奶嘴，係依照媽媽胸部嘅形狀去設計，令我覺得樣樣嘢都好新奇。」
