亨得利（3389）主席張總今次和陸叔會再分享為什麼集團選擇來港上市，亦會跟大家談談他如何看鐘錶業的發展前景，以及訴說其集團的拓展計劃。

陸：亨得利係喺〇五年嚟港上市，有咩原因驅使你哋咁做呢？

張：香港係一個自由市場，亦係一個透明度高嘅國際金融中心，我哋揀喺呢度上市係基於業務所需，又好想海外投資者透過入股亨得利，去了解發展潛力龐大嘅中國市場，同埋為中國投資者提供一個入股亨得利嘅投資渠道，為投資者添加多一個投資選擇，同時我哋亦因為上市得到更大嘅國際知名度。

陸：亨得利喺上市呢十年入面，有無遇過咩大挑戰？

張：陸叔，睇翻我哋上市後呢十年，由最初嘅二十幾間鋪，做到o依家我哋喺大中華地區開咗成五百幾間鋪，絕對可以話係亨得利嘅高峰發展期。我哋嘅年收入更去到過百億，故然因為內地人均收入急增，促使佢哋喺消費上手鬆咗，仲因為佢哋對生活品味有咗要求，變相就多咗消費者買貴價嘅瑞士錶喇，好似卡地亞、伯爵呢類牌子嘅錶，大大刺激咗貴價鐘錶嘅零售市道添。

陸：咁喺零八年嘅金融海嘯亨得利點應付？

張：不嬲我哋同策略投資者、以至合作夥伴長期都保持緊密溝通，喺海嘯爆發後我哋大家更充分發揮企業互助精神，而且我哋係用人民幣結算，所以喺嗰時嘅影響比較微。反而因為海嘯爆發仲衍生咗最佳買貨機會，我哋用最優惠嘅價錢去買到優質嘅貨，待經濟好轉時就出貨，大概喺海嘯發生後半年左右，我哋嘅業績就慢慢咁做翻上去，更為公司帶嚟咗豐厚盈利添。

陸：所以話，有危就有機咪就係咁解囉，哈哈。咁喺一一年嘅歐債危機，你哋喺管理上又有無咩影響？

有危先有機

張：當時歐洲要減債，加上歐元又貶值，我哋嗰時最重要係做好鐘錶零售業務先啦，其次就係做好風險管理，將市場資本投資價值分開，總之萬事以穩固長期以嚟建立咗嘅主業為根基。

陸：最近內地訪港旅客人數持續下降，你覺得香港零售業係咪已進入咗寒冬，亨得利又有咩計仔去應付呢？

張：陸叔，內地買奢侈品嘅人其實係無少到嘅，只不過有部份分流咗去日本同歐洲直接入貨，當中可能牽涉好多唔同嘅購買行為同習慣都未定。但無論消費者喺邊度買都好，佢哋買咗錶都一定需要售後服務，咁我哋當然秉承一向為客人提供高質素維修服務嘅宗旨，我哋亦會好積極咁去做好客戶服務，令無論國內或國外嘅客戶群，都會記得搵值得信賴嘅亨得利。

陸：除咗提升售後服務質素之外，亨得利喺未來仲有咩發展大計？

張：我哋會持續擴展做「鐘錶零件製造及銷售配套」業務，依家已經幫緊啲瑞士表做錶殼、皮帶、同錶面玻璃咁。腕錶嘅靈魂即係機芯同裝嵌當然繼續由瑞士嗰邊做翻啦，我哋好有信心喺零件製造及銷售配套呢個層面上做大做強，亦好希望可以開拓埋其他鐘錶零件製造產品，發展成為更多元化產品嘅企業。

陸：回顧過去，有無人或事值得你記住嘅呢？

張：好開心可以同斯沃琪集團（Swatch Group） 嘅尼古拉斯•海耶克合作，他致力維護、改進及發展瑞士製錶業，佢嘅精神深深咁打動我，依家我哋同佢嘅仔尼克‧海耶克（Nick Hayek） 繼續一齊探尋新方向，貫徹傳承品牌背後嘅情感價值去合作。

陸：張總，你認為年輕人點先可以入行呢？

張：無論做邊個崗位，我覺得最重要嘅係你要鍾意鐘錶。如果想做前線銷售，要好清楚每個品牌嘅歷史，要了解每個品牌嘅特徵同個性，時刻為客人提供專業知識；如果想做後勤維修，咁就要對卓越品質同藝術美學有要求同追求，仲要不斷學習做事認真謹慎，喺某程度上甚至要去到熱愛呢個地步。