警囧四合一
暑假進入尾聲，但係港產片就藉此黃金檔期繼續發力。即將喺8月27號上映嘅《猛龍特囧》，集警匪、搞笑元素於一身，自然不乏捧場客。
今晚「Paco巨星飯堂」就邀請電影嘅導演兼男主角胡耀輝（Mark）、女主角雨僑、監製田啟文及石詠莉（Sukie），去到位於觀塘嘅「稻．拉麵」，一邊品嘗特色日本料理，一邊暢談鏡頭背後嘅二三事。
我帶Mark、田雞、Sukie及雨僑（左至右）去到位於觀塘嘅「稻．拉麵」，品嘗特色日本美食。
自導自演
Mark今次再次自編自導自演，唔同嘅係佢已升格為其中一位男主角。「故事講我同Ronald（鄭中基）係一對好朋友，兒時發生咗啲誤會，中學時佢去咗美國讀書，返嚟已經變咗個黑鬼卧底警察。而我係一個以為自己好靚仔，想做明星，去參加一個《中國好男兒》選港男嘅活動，期間我就目擊一單案件，牽涉到香港首富個仔撞死人不顧而去，令我被人追殺，最終究竟係公義定惡勢力贏呢？就係咁樣嘅喜劇。
Mark（左）自編自導自演嘅《猛龍特囧》，令雨僑（中）首次有機會發揮搞笑細胞。
「其實我會演出都係拜Ronald所賜，當初約佢出嚟傾劇本，佢就表明如果我肯做嗰個肥仔角色先會考慮，我心諗佢係咪整蠱我呢？我又唔識佢，無理由整蠱我o架。佢話唔係整蠱我，仲話如我肯做，佢馬上接呢部戲，如果我唔做佢就要再諗諗，所以我決定做。」
兩位男主角人選拍板後，Mark接受挑戰，仲大讚對手嘅專業。「有場戲講我同佢喺人造沙灘上傾偈，場戲大約三頁紙，大家一take搞掂，雖然劇本出自我手，但好多時我都唔會記得對白，但係Ronald背對白真係好犀利，埋位前我話若然NG唔好鬧我，但係佢對我好有信心。」
吉列蟹肉忌廉薯仔（$38），外脆肉軟。
黑拉麵（$74、左圖）及赤拉麵（$74、右圖），採用豬骨湯底分別配上黑蒜油及辣油，製出不同風味。
首次搞笑
哈哈哈！同樣為部戲獻出第一次嘅，係女主角雨僑。「今次係我第一次演喜劇，最重要嘅笑位有啲都落喺我身上，所以花咗好多時間去揣摩，阿Mark陪我做咗好多功課，除咗造型好笑外，我哋連行路嘅步伐、形態、小動作，全部之前都度好晒，令我喺嗰段期間成日都私私縮縮。」
一講起同男友嘅心血結晶（大碟），Sukie笑得格外甜。
導演盛讚Ronald（中）喺戲中表現出色。
雨僑嘅突出造型，令人一睇就想笑。
雨僑指導演喺開拍前，已細心地同佢一齊為角色設計多個小動作，更凸顯角色形象。
講到最深刻嘅部分，雨僑表示：「喺戲入面我副眼鏡同經常撞牆都係笑位，但係拍嘅時候，每次action前都要望清楚，數清楚腳步，因為戴咗眼鏡就睇唔到嘢，一路行一路做戲，如果係一啲好長嘅戲，就會係咁跌係咁撞。
「我同阿Mark、Ronald對手戲多，印象最深刻係去上海地盤拍我被綁架嘅戲，講佢哋嚟救我，嗰時天氣好熱，我畀人踢咗出去半空，冇綁安全帶，諗番都幾危險。」
自資出碟
另一位女將Sukie，喺戲中嘅戲份較少，但佢最近喺拍拖4年嘅男友鄧健泓鼓勵下，決定自資出碟，「既然搵唔到人出，不如自己出，反正我同佢都鍾意創作，仲加埋個朋友自己投資搞埋製作，起碼算係還咗自己一個心願。」
Sukie表示入行初期走性感路線，無疑會影響外界對佢嘅印象，「好多人好自然唔會留意我啲歌唱成點，所以今次我哋派台時，都專登唔講係邊個唱，等大家先認識我嘅歌聲，呢招幾有效，好多人都估唔到係我唱。」
Sukie自資出碟《聽聽Sukie's》，誠意可嘉。
今次鄧健泓不但出錢，仲出力親自幫女友嘅新碟派台，Sukie講起都好sweet，「今次真係好多謝佢，佢出咗好多力，如果冇佢鼓勵，我都未必有信心再出碟。其實我哋有共識大家係結婚對象，但真係未有計劃，或者等我哋搞埋隻碟啲嘢先啦！」
哈哈哈！咁我祝今晚咁多位嘉賓嘅新作大賣！人生亦充滿色彩！乾！
岩手縣白金豚肉定食（$398二人前），包括沙律、極上刺身、秘製串燒、岩手縣白金豬扒及稻庭烏冬，二人世界啱晒！
帶子牛油燒（$78），夠晒惹味。
紫蘇豚肉串（$28/串），黑豚肉配上紫蘇葉，分外清香。
