別人笑我太瘋癲 李逸朗
一首哭song〈傻女〉，令李逸朗（Don）人氣爆燈，才一個星期，此歌的youtube點擊率便有八十多萬。「八十幾萬！睇番我以前英皇年代嘅歌，加埋都唔夠八十幾萬！淨係呢幾日，我都做咗十幾、廿個訪問，我唱咗十二年歌，都未試過畀人咁關注！」
哭song〈傻女〉成功之處，在於阿Don全曲以哭腔演繹，最後再加上淒厲慘叫聲，其獨特的意識流唱法，勁到連原唱者陳慧嫻也屈服：「我輸咗啦！佢唱嘅感情比我豐富咁多。」而普羅大眾的口碑，則大多數以「黐線」來形容，指要介紹醫生給他。
「醫生其實唔使介紹，我都識好多，撻我朵分分鐘仲有折添！哈哈哈！」
被評為「黐線」，不難受嗎？「聽歌每個人都有自己睇法，畀人鬧到飛起都係言論自由，我覺得OK嘅。而且呢壇嘢其實好有哲學，因為我發覺自己原來已經升咗再高一個層次嘅唔在乎，我直情可以抽個身出嚟，覺得唔關自己事：〈傻女〉係邊個唱o架？當乜嘢都冇發生過。
「但無可否認，o依家真係我入行以嚟最風光嘅時候，不過可能係『瘋癲』嘅『瘋』囉。」
我鍾意
以哭腔演繹〈傻女〉，李逸朗解釋，他不過只想讓大家知道，這首歌的情緒，其實可以去到如此地步。「我o依家唱嘅，係個男仔暱喺屋企歇斯底里嘅慘，咁關唔關大家事呢？其實（陳）慧嫻嗰陣唱都慘o架，但佢唱嘅只係女仔嘅慘咋嘛。
「我唱歌，不嬲都好隨意，覺得係點就點演繹。o依家我自資出碟，係我嘅創作，我鍾意點做咪點做囉！我個腦嘅嘢，使唔使同大家解釋呀？」
哭song〈傻女〉MV，阿Don說是去年四月拍的。「我好感恩個MV夠簡單，啲網民易抄嚟惡搞，大家開心幾好呀！」
他說，這首在自資翻唱碟《Fly Me To The Earth》的最後一曲，本來並沒有打算派台，那天忽然在網上爆紅，純屬意外。
「我呢隻碟其實上年已經喺大陸嘅網站可以合法下載。有個網民可能就係咁聽到最後呢個track，聽到自己都傻埋，就寫咗篇千字文出嚟，話我呢條友係咪黐線，跟住就有人擺埋我呢首歌上網，畀人鬧到我飛起！
「其實我究竟做咗啲乜嘢呢？只不過係一隻唔派台嘅歌咋喎。你諗吓，以前我舊公司英皇，用咗幾多方法嚟present我，都冇呢隻歌嘅noise咁大！」
