爭取民主一步到位 美外商：不可能
號稱最民主的英美幾個國家，經常有輿論隔岸替佔領行動打氣，但一班喺香港搵食的「國民」，卻身受佔領運動的苦果，睇法就同祖家好唔同。
有政商人士近期出席一個餐飲業聯會（FDGA）午宴，現場有唔少飲食界老闆及外商。各人聚頭免不了關心佔領運動結局會係點，據講呢班商人部分最初抱隔岸觀火心態，普遍同情學生同佔領者，但行動持續六、七十日咁耐，人人開始感煩厭，班商人認為運動目的已完全失焦，根本唔知學生佔領者想爭啲乜，有進冇退嘅策略，嚴重影響香港喺健全法治保護下的穩定營商環境。
金鐘夏愨道一帶是香港商業中心交通要道，現時已被示威者佔領了七十幾日，歐大衛表示香港已變成政治城市。
據了解，主持午宴演講係總商會首席經濟師歐大衛（David O'Real），David係加州人，佢居港三十幾年，當正香港係自己屋企，佢回答台下出席者提問時，感同身受講，佔領運動已將香港法治城市變成政治城市，香港人要民主可以逐步喺提委會門檻內提高爭取參與度，但要一步到位有難度。
佢以香港稅基淺窄為例，只有兩成納稅人口撐起香港經濟，又點可能由另外八成非納稅人口話事？連佢呢個美國人都咁講，現場不少人都好明白呢種拮肉之痛。
佔領運動引起來自民主國家的外商反彈，香港法律界精英亦唔buy，有資深大律師話最近出席一個法律界猛人宴會，與會者好多係平時言行相當民主之人，但一傾起佔領運動，個個都搖頭歎息，唔少人竟然用「煩厭」去形容，語氣相當不屑，睇來佔領運動連屬民主陣營的「自己友」都不滿。
