鳩嗚辱警 香港人優先做爛頭卒
佔領運動七國咁亂，清完場的旺角又來鳩嗚，晚晚有百幾人話行街其實阻住店舖做生意，店主為免招來報復，對滋事分子多數敢怒不敢言，情況持續至今了無寧日。有政壇中人向本刊報料，話大家都將焦點放喺幾大激進政團身上，忽略咗連解放軍營都敢衝嘅「香港人優先」。
知情者話，香港人優先知道泛民唔多鍾意佢哋，今次好少攞支港英旗出來，而係混喺人群中，一時帶頭衝，一時喺後排煽動撩是鬥非挑釁警察，經常製造衝突場面，策略都幾成功。
「佔旺期間有個一身『美國隊長』出位打扮的，就係香港人優先的新活躍分子，佢姓容，大家都叫佢Andy，平時好似路人甲咁用粗口鬧警察，又唔知喺邊度變身美國隊長跳出來，周圍叫囂叫人衝，有一次畀人見到佢背囊成套cosplay架生，先知美國隊長原來係佢。」
「美國隊長」經常用盾牌與警察互撼，當正自己係正義超人，經常搞到場面大亂。
人力幕後動員鳩嗚
消息指，美國隊長喺九．二二學聯喺中大罷課誓師時，已喺現場揮舞港英龍獅旗，但好快被學生制止。旺角被佔領後，佢唔再舉旗，但就扮成美國隊長長駐街頭，有衝突就衝上第一線，甚至用盾牌打「反佔領」者。容現已被警方以涉嫌普通襲擊罪拘押。
香港人優先召集人張漢賢（Dickson）係另一惹火分子，佢今年六月立法會財委會審批撥款時有份衝擊，警方已經向佢落charge，但竟然癲到再喺排期上庭前，十月中到中環解放軍營揮舞港英旗挑釁。
知情者話，另一個前核心成員招顯聰，雖已退出香港人優先，但經常同張漢賢鬥出位。十一月二十七日當晚，佢一馬當先喺旺角現場高呼「重光」，推推撞撞下被警方拘捕，法庭繼而頒下禁制令唔畀佢入旺角。
另一名被警方拘控的「閃燈男」盧建民，據講亦曾經係香港人優先成員，喺上月初旺角衝突場面中不斷用手機閃燈射向警察挑釁；九月初全國人大常委會副秘書長李飛來港時，盧建民亦有份到君悅酒店「招呼」李飛。
旺角鳩嗚行動另一發起組織就係人民力量，話要以打游擊方式喺旺角金鐘四圍串連，加埋香港人優先這幾個搞事分子，都乘佔領運動尾聲頻頻出來抽水，唔知幾時至鳩嗚完？
張漢賢（中）十月中又再衝擊解放軍營，與場外一些反佔中人士起衝突。
招顯聰（左）已被頒禁制令不准踏足旺角，另外明年一月二十一日提堂被控襲警罪。
