這天的日本新宿大道步行者天國，好像為周秀娜而開設。

攝影師一舉機，人群應聲散開，她像有擺之不盡、用之不完的甫士存貨，要恨的是，在近三十度氣溫下，我沒有牙膏牙刷。

於汕頭出生，十歲由居住的潮陽市移居香港，由在內地名列前茅的高才生變成老師口中的籮底橙，後又發憤圖強重登前列位置，升上中學後無以為繼，中五畢業當上金百利商場售貨員。多得悶熱的天氣，她身穿貼身背心在街上派傳單，即獲模特兒公司星探青睞。又多得o靚模熱潮，一本九十八元的寫真集、一個五百九十八元的攬枕，讓她搖身一變成為百萬富婆。

月初，周秀娜還越洋行騷。

「今次真係一個model job，其實邊度做嘢心態都一樣，用番平時喺香港做嘢嘅心態。喺台上感受現場氣氛，好深刻印象，好難忘。見到好top嘅model，冇去比較，香港都有一班好top或者比我更加有經驗嘅人，我覺得無論喺邊度，都會視之為目標，視之為學習，每日接觸到唔同範疇嘅人，唔同嘅model呀、前輩呀，都唔係比較，我相信可以喺唔同人身上學到唔同嘅嘢。」

言詞華麗得連和她隨行的宣傳同事也說：「同我心裏面答案一樣。」用model answer答問題，可能也是model工作之一。

衝出了香港，周秀娜已不是普通o靚模。我執香港政府口水尾，她已是「亞洲國際o靚模」。

在日本Tokyo Girls Collection行騷，演繹一套衫，天橋上匆匆一分鐘，周秀娜搏到盡想出脫外套露肩單眼甫士。

成手都是溶掉的雪糕，加上胸上一滴，令周秀娜塞班島寫真集在書展一枝獨秀。

盧海鵬扮周秀娜前，是不知道誰是周秀娜的，周秀娜其實有本事令盧海鵬更加紅。而因為周秀娜在中環街頭做了現實很難實現的事，所以她成為不少人的夢幻女神。

鄉下住整棟樓

魚不過塘不會肥，周秀娜這條32D過塘魚不肥，還愈做愈瘦，五呎六吋半高，體重九十二磅，上星期更因工作過勞，食無定時，胃抽筋入院，一定擔心死世伯伯母。其實現在捱生捱死的她，又何嘗不曾是活潑可愛，返學放學食玩瞓的o靚妹？

「細個生活好開心o架，因為我住嗰個城好大，嗰陣時就已經唔係種田，係城市生活。成棟樓都係自己嘅，住得好開心，同埋啲親戚又全部喺自己屋企附近。

「過時過節好開心，好多親戚，好熱鬧，可以放煙花，細個都冇咩嘢要擔心，生活冇乜煩惱。香港好細，香港嘅屋都好細，嚟到香港就好似好多嘢收細喺一個空間入面，好似一條魚喺大海，突然間游咗去一條河，或者一個塘咁樣囉！啱啱嚟到香港有呢啲感覺。環境轉變當然有，因為我適應能力好強，同埋我嚟香港之前已經收到香港嘅電視台，言語方面已經唔係問題啦！除咗英文之外，學習方面都唔係問題，因為小學課程好易追，所以嚟到呢度個零兩個星期已經適應到。」

隨着時間流逝，社會進步，她由o靚妹變身o靚模的同時，不少親戚也各散東西。

「我啲堂細妹， 好似我咁嘅年紀，都好似我一樣，都去咗廣州或者第二度生活、打工。」

不高不低的目標

有人計過養大一個小朋友要四百萬，有人計過周秀娜至今的收入，足夠養大一個小朋友。一個不覺意，她已晉身百萬富翁行列，更積極置業。

「嗰個數係人哋幫我計，個價錢唔係真係實質接收到嘅數目啦！（係更加多？） 畀的幻想空間大家啦，哈哈哈！錢一向唔係最大嗰樣嘢，唔係乜都向酬勞嗰方面諗嘅，我依家做緊每一樣嘢都好enjoy囉！

「想儲錢買層樓同屋企人一齊住，當然只係畀首期啦，因為我住緊嗰度係租嘅，想買層樓同我屋企人一齊供，可以投入番多啲嘢入個家庭，想爹哋媽咪住得開心啲舒服啲。其實一路都想買，既然收入真係多咗，呢個諗頭就更加堅定！諗住買七百零至八百零呎，我住緊嗰度都係七百幾呎，都夠住嘅，千幾呎太貴呀，除非買村屋，但村屋又太遠就唔到大家返工。

「依家忙咗，少咗好多時間陪屋企人，同埋都少咗坐低一家人食餐飯，因為媽咪煮啲嘢其實好好食，同埋我都好鍾意食潮州嘢！」

寫這篇專訪，我覺得很輕鬆，因為我雙手寫衰或寫好周秀娜的威力，遠不及一隻田雞。

在沙灘上拍攝的纖體廣告遭禁播，沒有影響周秀娜心情，因為她知道當時聽導演做事便是了。

看得開

不知道周秀娜何時踩親何人條尾，出本寫真集被人口誅筆伐，有model與她劃清界線，博見報口痕友又睇死她「玩唔長」，傳媒質疑她的樣貌和身材涉後期加工，不過周秀娜一於你有你鬧，我有我做。 「我依家都畀人起晒底啦，哈哈哈哈！（未有人掂到你條底線？）我依家都OK嘅，都接受到，呢樣嘢就係入呢個圈所要付出嘅代價。

「呢啲嘢隨住多人認識咗我之後引伸而成嘅是非，每個model或者藝人，當多人認識之後，都好似係必經之路，我知道全部嘢（身材樣貌）都係真嘅就得，我深信一個人成長，終究你會進步o架嘛。既然做得娛樂圈就要將最靚嘅嘢畀大家，因為大家都鍾意睇靚嘢，如果永遠停留喺以前，你都唔會認識到我啦！

「我日日都睇報紙雜誌，成日都接觸到呢啲嘢，都知道娛樂圈多是非呀！始終都要有新聞，要有娛樂，娛樂喺香港佔好大部分，係唔同市民，唔同年齡階層茶餘飯後都會睇嘅嘢，如果大家睇得開心，又得到娛樂咁就足夠囉。每一行都有是非o架，只不過我哋呢行啲是非有啲唔係真實嘅，甚至乎喺冇辦法嘅情況下一定要畀大家去睇，只要我明白自己必須要付出嘅，我唔會介意呢啲嘢，冇乜所謂！」

兩年前被叫「o靚模」前的周秀娜（左）拍了《出水芙蓉》，當時樣貌更o靚。

出水

既然已經衝出香港，周秀娜還會認為自己是o靚模嗎？ 「由頭到尾『o靚模』都係一個名稱，我哋係一個可以接觸到嘅對象，冇咁遙遠。我對於呢個稱號都唔care，亦唔介意人哋將我歸類，我知自己做緊啲咩咪得囉！我相信每個人分類都唔同o架嘛，總之我做緊嘅嘢係我自己想做嘅，就冇乜所謂。」

或者她說得彆扭了一點，簡單來說，假設我是喜歡看model的電車仔，外地top model太遙不可及，就選擇了喜歡周秀娜。理念或者和黃興桂的金句「蔗渣嘅價錢踢出燒鵝髀嘅味道」差不多。

「我希望喺電影方面作多啲嘗試，試多啲唔同角色，同多啲唔同人合作，咩角色都冇所謂，最緊要大家畀機會，做artiste如果要全面嘅應該乜都試囉！我model事業依家都OK，但電影方面仲係好新好新，不幸地《出水芙蓉》仲未出到水。未來目標希望喺電影方面，可以出水啦！哈哈哈！」

蔗渣model也好，燒鵝髀model也好，口袋裏需要有幾個model answer傍身，間中，也可以在其中加些點綴。新宿大道步行者天國，也要有「二啦沙依媽些」背景音樂陪襯，旺角行人專用區，亦間中有鏹水在頭頂飄過吧。