數年前，保養得宜的熟女，被稱為「美魔女」，伍詠薇是名單上其中一員；最近則流行用上數字化的日語「50路」，跟美魔女不同，年約五十，不一定keep得好，這次就不包括伍詠薇。
「我鍾意自己50路嘅狀態，幾年前我已經覺得自己冇遺憾，雖然我未去晒全世界，又冇李嘉誠咁多錢，但係人係咪要擁有所有嘢先完美呢？」
事業上，新作《歎息橋》才剛於ViuTV播畢，她隨即加盟「邵氏」，繼續搏殺。愛情路上，她跟丈夫練海棠，去年已慶祝過結婚廿周年紀念，問她可有維持夫妻生活，她即心領神會，笑說：「當然！我知你問乜，咁梗係仲有夫妻生活，但係唔會咁狂熱啦！我都同老練（她對丈夫的䁥稱）講，我都估唔到會同佢成廿碌。哈哈！
「我嘅人生係障礙賽，行過咗就好，如果我冇以前嘅經歷，o依家可能係一個好膚淺嘅八婆。」
要如五十一歲的伍詠薇般，淡然坐看風雲過，從來都是高難度動作。

 

未到更年期

伍詠薇的「障礙賽」，大概比一般人的崎嶇，但真正令她跪低的，是四年前的「都市病」。「我細個就已經有強迫症，會拎啲衫熨平、摺到好好再收埋；見到啲嘢擺得唔好，我啲情緒就出晒嚟。以前唔會覺得係病態，好彩都對生活冇乜影響，到一六、一七年左右，我就有少少情緒問題，後來我諗，可能係因為無形壓力。我一直有睇中醫養生，當時我問中醫，會唔會因為係更年期呢？o依家女人四十幾歲都可以係（更年期）o架嘛，但佢把我脈就話我唔係。
「我係一個好樂觀嘅人，係有時發吓忟憎，但當時我試過偷偷爆喊，又試過一直喺張牀度典，唔想郁、唔想見人。當時我諗，我經歷過咁多comes and goes，咁我都搞唔掂？我就challenge自己，要自己醫好自己。」
未到更年期，但伍詠薇給自己的挑戰，難度也不低。「好彩我個人癲癲哋，所以慢慢透過做高溫瑜伽同行山，再睇佛經同一啲道理，重新整理情緒。經歷過呢件事，我都開心番，之前唔知係都市病先以為係更年期啫，我o依家仲有periodo架！」

 

廿載前後，伍詠薇不忘感激丈夫對她的包容。