港鐵署任CEO 係梁顯利後人

港鐵行政總裁韋達誠提早離任，副行政總裁梁國權（圖）即刻接過燙手山芋署任，外界紛紛議論這位「二佬」有冇機會「坐正」。梁喺劍橋大學畢業，○二年入港鐵，後升至財務及業務拓展總監，兼任八達通主席，傳聞一直是港鐵悉心栽培的CEO接班人。

梁國權另一鮮為人知的身份，是早年英商怡和買辦梁顯利的後人，係長子梁紹榮嘅次子，家族第三代接班人。梁國權上有兄長國偉，下有一弟國輝，在藝術界甚吃得開，梁國權自己則極之低調，很少向人披露名門之後這個身份。有港鐵中人笑說，他勤力到得人驚，好難想像他原來含住銀匙出世。

梁顯利有多名兒子，最為外界熟識的是其庶室所出的梁紹鴻，他創立大鴻輝興業，有舖王之稱。

據悉，當年地鐵、九鐵合併後，梁國權調兵遣將，派同事到北京、深圳和杭州睇實幾條地鐵線興建，○七年港鐵接手倫敦其中一條鐵路，亦是由他主責，將香港經驗帶過去。

工作以外，梁國權係保護兒童會主席，原來他做咗該會委員超過十年，對兒童工作都幾上心。至於佢平日除了打高爾夫，聽講仲學緊少林功夫。

一○年八達通爆出大醜聞，被揭出售客戶資料圖利，令梁國權仕途栽了一交，被減年薪並要公開道歉。去年港鐵全球招聘CEO，梁國權入到最後兩強，不過遴選委員會最後屬意韋達誠，而他則坐上「二佬」之位。現時港鐵正全球物色新CEO，據聞梁國權亦在名單上，再上層樓並非不可能。

關於港鐵第一份調查報告，坊間仍然議論紛紛，港鐵獨立董事委員會主席馬時亨就話，港鐵五個工程一齊上馬，導致消化不良，係急於求成。對立法會鐵路事宜小組委員會主席田北辰繼續追殺港鐵，話董事局不聞不問，馬時亨就話董事局係監察機構唔係管理機構，不可能事事介入。