ＣＹ政府硬鬥硬 建制派兩面不是人

改諮詢報告出籠，醞釀逾年的政改大戰正式拉開序幕， 眾人都聚焦喺下個月，睇吓阿爺點拍板。

據透露，政改諮詢報告將喺八月二十日，正式提上全國人大常委會議程討論，預計最後一日會議完結後，會有具體決定。

消息人士指，政改建議會緊跟基本法規定，唔會有乜驚人轉變，尤其係各界爭議最激烈的提名方法，「提委會提名」方案已呼之欲出，唔會有其他選擇。相信亦跳不出「機構提名」框框，以「簡單多數」為提名原則。

泛民激進派叫價一鋪被擊沉，政府內部估計，佔中幾乎肯定開拖，八月底一定打到飛起。

有政府消息更估埋佔中日期可能喺八月二十九日啟動。

事實上，學聯和學民思潮班後生仔已預告，若阿爺嘅提名框架不符合國際標準，一定唔會再跟「佔中三子」的時間表，尤其係戴耀廷。事關佢到現時都唔肯定下一個明確佔中日期，仲要車前退後，話最遲可以喺明年五月底至佔中，愈搞愈遲，學界索性自行喺八月底揮大旗。

議會對立氣氛嚴重，梁振英每次出席都引發泛民陣營離場抗議，沒有泛民的議會，代表性亦受質疑。

知情人士話，人力、毓民班人希望搭學民仔嘅順風車，一齊搞大佢，近日搵人同學民仔聯絡，話願意做開路先鋒，保駕護航咁話，不過，學民仔驚到時反而會被搞亂檔而唔制。

學民仔傾向同學聯合作，由校園罷課到總動員去市區，包圍政府建築物。為咗試驗八月底行動work唔work，有人提議不如八月中考慮先預演一次「佔中」，唔係喺中區，而喺中文大學。

點解佔中要拖埋中大落水？因為之前學民仔頭頭係中大學生會會長，加埋亦有學民成員入到中大，有意見認為中大最有條件成為學運山頭，八月中又正值迎新營（Ocamp），可以動員新仔，百萬大道又係最佳預演場合，如果成事，相信校長沈祖堯都有排煩。

立法會終於收爐，今年會議可以用大塞車去形容，「三堆一爐」撥款、低津計劃、公務員加薪方案，以及成立創新及科技局等決議案，全部都要到十月復會後，從頭再來。

內會主席梁君彥同本刊大吐苦水，話泛民拉布的確令立法會近乎癱瘓，但好多議員都感受到特首CY同官員愈來愈夾硬來，唔少議案連諮詢都慳番，直接掟上立法會，「佢心態以為數下建制派夠票就過，以為仲有保皇黨一定要幫保駕護航，點可以仲有咁思維？」

以今次最終都過唔到的創科局同推三堆一爐議案為例，梁君彥話，政府事前完全無同建制派詳細諮詢，更加唔好話同泛民傾，「招呼都冇句，成份paper掟入來，以為建制派實幫佢過，係要硬闖，但完全冇民意基礎，搞到一鑊泡。」

梁君彥指，尤其是爭議多多的三堆一爐，好多建制派議員接到文件後，才知政府大概構思，不少細節仍有疑問，如何敢投贊成票？

梁君彥總結內會一年經驗，對議會半癱瘓極感無奈，他認為政府要負很大責任。

「建制派議員都要同佢哋啲地區選民交代o架？」梁說，CY同現時政府官員不擅亦不屑打民意戰，凡事都擺下戰鬥格，政府不主動化解矛盾，積怨只會愈來愈深，「泛民有時都有好意見，就算唔啱，可以用其他民意砌番泛民；硬鬥硬的結果，係次次特首一到，泛民起哄完又集體離場，立法會成日都無泛民份，同半癱瘓有乜分別？」

不過，亦有政府中人同本刊呻慘，話上兩屆政府執政頭三年都有蜜月期，政策較順利推行，但呢屆政府一開始就打逆境波，加上目前政治路線太分明，就算去到一啲民生議題，議員都要為選票而不撐政府。呢位政府中人估計，一五、一六年接近選舉年，佢哋只會有更難打的仗。