協恩不敗神話

這是個學界的不敗神話。代表全年學界體育總冠軍的紫荊盃（前身為玫瑰盃），協恩中學攞足三十年（下圖），可謂前無古人，後無來者。

每年中學界有十幾項包括田徑、游水、球類等運動比賽，每項前列名次都可計分，全年總成績最好的一間學校，便可捧走隻盃。協恩自八五年起，年年都衛冕呢項學界體壇最高榮譽，認真巴閉。

佢哋六月底搞咗個慶功宴，三十年來有份為隻盃付出汗水的「協恩妹」，不少都有出席。聽佢哋講，今年贏得有點驚險，因為越野長跑項目出乎意料輸了一截，好彩之後喺其他球類比賽追番上來，埋單計數，以十三分險贏。

為咗延續紫荊盃神話，學生今年練習特別艱苦，清早上課前、中午吃飯、還有放學後，甚至連假期都回校練習，基本上除了上堂以外所有時間都用來備戰，箇中辛苦不足為外人道。

協恩運動咁勁，前校長黎韋潔蓮（上圖）居功至偉。退休十多年的她在慶功宴上一出現，全場即起立鼓掌。這位大家閨秀型校長，七八年加入協恩後即大力鼓吹女學生參加運動。那年代的女仔個個斯斯文文，邊有咁活躍？體育堂最多都係掟下豆袋。但黎太力排眾議，認為運動除了可鍛煉體魄，更可磨練意志，女學生將來打工也好、做人媽媽也好，面對困難都不會那麼容易放棄。

黎太說，常教女仔說話要有自信，但如果佢連站在千幾人前面的機會都沒有，如何學習自信？運動就是一個訓練自信的過程。

年輕人在競賽中輸過跌過，到贏的時候就更感覺得來不易的喜悅；將來在人生路上跌倒，都識得自己想辦法爬起身。佢哋話，「協恩妹」有種共通性格特徵，就算面對幾艱巨的任務，點都會想盡辦法完成，唔會輕言放棄，而呢種韌力，係喺比賽中歷練回來。

好多人問，紫荊盃乃學界大獎，自然兵家必爭，協恩不敗的秘密在哪裏？有位「協恩妹」解開箇中謎團，佢話友校女拔萃好早轉咗直資，有條件收更多運動精英，可以說是贏在起跑線上，所以佢哋好容易出到super star，喺個人運動項目例如游水、跑步等，女拔都有超卓成績。

不過，一去到講求team work的球類運動，就輪到「協恩妹」發威，皆因「協恩妹」習慣有團隊精神，不在乎個人演嘢。

協恩校舍在土瓜灣，一直收很多基層學生，不少家境都不及友校的女生理想，可能因為咁，「協恩妹」更知道集合好多個「小我」，才能成就「大我」。