陳裕光搞音樂Gathering

最近興起「Coffee Gathering」這個潮語，連大家樂主席陳裕光都搞起gathering來，不過他搞的是音樂聚會，仲想透過比賽發掘新一代歌神。

陳裕光好鍾意唱歌跳舞，覺得音樂係減壓良方，好的歌詞又可以勵志。他說父母都一樣愛音樂，小時候家裏終日播放着黑膠碟。他記得少年時代只聽英文歌，例如〈The Impossible Dream〉、〈Imagine〉等，學到好英文之餘又建立到正面的價值觀。問佢當年有無發歌星夢，他笑說以前掛住讀書亦比較怕醜，只唱過民歌隊，沒想過面對幾千人自彈自唱。

後來他在加拿大進修並生活了一段時間再回港，開始迷張國榮和陳百強，好多歌曲都朗朗上口，飲歌是〈漣漪〉。至於現在，他就鍾意電視劇《天與地》的〈年少無知〉，不時哼着「年少多好， 頑劣多好……」。

陳裕光見到近期《中國好聲音》節目人氣強勁，也想辦一個類似的比賽，給青年人製造機會，佢話好多後生仔好有音樂才華，但除非識得門路，否則都幾難出頭。這幾星期他先在街頭谷人氣，在旺角、銅鑼灣等旺區擺街站，吸引青年即席獻唱（圖右），想不到十分受歡迎，吸引了五百幾個表演慾強的後生仔。本周日他又搞音樂營（圖左），請導師來教佢哋唱歌技巧，八月正式比賽。佢話有三百幾個後生仔一齊聽導師教唱歌，十分熱鬧。

搞比賽，不單止搵出香港好聲音，陳裕光是想增加新一代的正能量；想做好歌手，跟發展任何一門事業一樣，天份以外，更多是努力和堅持。而他會請來幾個企業CEO老友，和最後幾強合唱，兩代人順便交流成功心得。

陳裕光笑言現在心態是多做漁夫，教人釣魚的方法。之前他便斥資八千萬開設商務中心，提供秘書、會計服務，只收相宜租金，幫助年輕人創業，等佢哋攞部電腦便可以開工，「好多人話返工像螞蟻，自己人生上半場主要做農夫，日夜耕作，現在做自己喜歡的事。」

問佢哪一首歌可以代替佢o依家的心境，佢就話Frank Sinatra的名曲〈My Way〉，仲自己翻埋歌詞，「我可以說，毫不羞愧地說，我沒有虛度，我自己走過的路。」