識睇.一定係睇盧宛茵
是咁的,因為改編自網上潮文《女朋友帶你返屋企食飯》的短片《公屋潮文》,Madam Lo盧宛茵近日成了網民熱捧對象,個個大讚她在片中那個「白鴿眼女友阿媽」的變臉演技超卓,為整段短片生色不少。
她入行四十年,從day 1開始,她便已經「做人阿媽」,「七三年我做《朱門怨》嘅『二少奶』,係張圓圓(張德蘭)嘅阿媽。」此後,不同類型的阿媽角色,她都幾乎演繹過。「嘩!演過幾多次阿媽,真係唔記得咯!『阿旺』(《戇夫成龍》及《阿旺新傳》)嘅慈母啦、《魚躍在花見》嘅惡婦(敖嘉年劇中母親)啦,仲有《卡拉屋企》搞笑嘅(黃家母親)都做過,哈哈哈!總之有得畀我做,我就好開心o架啦,因為我真係好鍾意演戲!哈哈哈!」
是真的,Madam Lo的確好鍾意演戲,就如這天拍照,我們希望她再次演繹短片中那三個變臉表情出來,她即對着鏡頭戚戚眉、抿抿嘴,然後再來一個四萬咁嘅口,七情上面,在冇對白、冇對手的情況下,發揮其「由外至內、再由內至外」的精湛演技,簡直冇得輸!
「居屋」樣
「私樓」樣
「公屋」樣
唔out得
在《公屋潮文》中完美地形而上演繹出「白鴿眼」三個字的盧宛茵,實情成長於一個不俗的家境。她是家中獨女,父親在洋行當文員,母親是全職家庭主婦,中學就讀英文學校。「邊間就唔好講喇,都已經執咗笠咯!哈哈哈!不過我哋嗰陣學校淨係得一本中國歷史,係中文老師教,其他科都係英文,全部先生都係老外,咁始終英文唔係我嘅mother language嘛,所以我有時啲英文都要問我老竇,或者我一啲英文好叻嘅親戚,成日都讀到半夜三、四點,開住盞枱燈,喺張書枱度讀讀讀,係咁死背,跟住六點又要起身返學,幾辛苦呀!哈哈哈!」