而我不知道臭蝦哥是誰 吳卓羲
吳卓羲,是一個緋聞是非停不了的人。
入行以來與他傳過緋聞的女星,十隻手指都怕數不完,曾被冠以「姐仔殺手」的稱號,被指專追電視台姐仔。
是非更是不時自動追埋身,真的躺着也中槍。剛剛就有前無綫助理編導出書,以「臭蝦哥」之名影射吳卓羲爆粗、對服裝間阿姐無禮貌和嫌同車武指一身汗臭等幾宗罪。
「絕對冇咁嘅事!我對爆料呢位舊同事全無印象,成件事其實好搞笑!」
否認指控,但對「臭蝦哥」這個與名字諧音近似的花名,卻是無任何回應。
三十四歲了,入行十四年有多,自言在無綫已是「大哥哥」級,對這些「飛來橫禍」也曾經很看不開。
「以前我最憎呢種新聞,有做過我都算,明明唔關我事,點解要屈我?」
經歷過很多是非才終於明白:
「娛樂圈就是一場遊戲,有些事笑一笑就算了,何必斤斤計較?香港人好善忘,娛樂新聞任佢噏,過一、兩個禮拜之後已經冇人記得。」
吳卓羲淡淡然中帶點無奈地說。
中槍事件簿
吳卓羲很惹是非,這次中槍事件,更是被翻七年前拍攝《少年四大名捕》時的舊帳。自稱偽文豪的前無綫助理編導出書爆料,以「臭蝦哥」之名影射吳卓羲為人有問題:
「佢好識做戲,不過就身嬌肉廢,武術指導搵咗個替身幫佢做咗啲較難動作場面。拍完後個替身同車一齊走,因為打完一輪所以全身大汗,成車都聞到佢陣汗味,架車行咗一陣之後,有工作人員要落車,臭蝦哥突然大大聲話:『喂!啲臭人唔該落車先啦,好很臭呀!』又指有次服裝姐姐幫他着古裝時,不小心拮親他,即大聲爆粗說:「好X痛呀!」之後全程黑口黑面。」
對如此這般的指控,吳卓羲先是笑着說:「成件事好搞笑!」繼而話:
《衝上雲霄》讓吳卓羲成功上位,十年後再拍續集,不論劇中還是現實,為人都成熟穩重了,也更懂處理是非。
「絕對冇咁嘅事,講臭的話最臭就係我同林峯,要落車就我哋落車啦!我同武指、替身都好熟,大家由細識到大,點會嫌人臭?服裝同事好專業,點會拮到我?而且佢哋係我前輩,錫佢哋都嚟唔切啦!點會爆粗?」
對於這位偽文豪,吳卓羲更是不予置評。
「講真我同好多幕後PA都好熟,大家係好朋友,但我對佢(偽文豪)就一啲印象都冇,完全唔識佢。」
年月增,人長大,吳卓羲說以前年紀還輕,曾經有段時間不太懂得和人溝通,但現在經一事長一智,經歷過這麼多流言蜚語,終於懂得如何處理。
「早幾年自己心態仍然好難協調,覺得有些事我真係有做過的話,畀人講我都冇得好講,但點解要屈我?o依家笑一笑咪算囉!過咗去就冇人記得。」
二○○七年拍攝《少年四大名捕》,七年後竟然被翻舊帳,確實有點無辜。
誇張是常識
娛樂圈搞笑事,又何止這一單?近來播映中的「新」劇《叛逃》,當中一幕關禮傑、陳展鵬施展「超能力」飛越天台的戲份,亦成為網上笑料。
「現實世界當然冇可能有人跳得過,不過拍劇就梗係要誇張,有網友講更加係好事,代表有人睇!有多些話題,就當是宣傳吧!套劇其實三年前拍,過程好多我都唔太記得,不過呢一幕我好有印象。一去到現場見到個陣,我就心諗好彩唔使我跳!二十幾樓工廠大廈天台,兩座樓中間隔十幾廿呎,雖然有武指搭好晒所有威吔吊臂一定安全,但都驚啦!」
吳卓羲其實怕高,試過搭飛機去加拿大,飛到太平洋上空時遇上強勁氣流,不斷急升急降,震了三個多鐘,他驚到要連飲四杯威士忌逼自己瞓着才捱得過,如非必要,更是絕不搭長途機。
三年前和陳展鵬拍《叛逃》,劇集近日出街時,吳卓羲坦言已經唔太記得當時拍過乜。「三年,個樣都唔同咗啦!」
不過,近幾年吳卓羲卻是常飛來飛去,皆因他近兩、三年不少時間都是北上拍劇,橫店、上海、深圳都有去,更讓他買了第一層樓。
「其實之前媽媽成日話我,入行咁多年都冇瓦遮頭,終於在香港買了第一層樓,o依家目標就係可以再買第二、第三層。」
只是返內地吸金,攢十多萬元一集的酬勞,卻也不是一件容易的事。
「最大問題中國太大,各地的說話方式和口音都有不同,講對白又唔可以配音,初期我花了很多時間學,仲要國內助手教我。又試過冬天拍戲,真係凍到講唔出對白,要搵熱毛巾暖住個嘴,不停口震震咁講。」
不過吳卓羲最希望還是可以中、港兩邊走。
「屋企始終係香港,最好可以中、港兩邊協調到,每年香港拍兩套劇保持知名度,大陸拍兩套劇搵多點錢。」
關禮傑和陳展鵬施展奇技飛越天台一幕,成為另一則網上笑談。
樣子太花心
有車有樓有事業,三十四歲也是適婚之齡了,就連吳媽媽都曾經這樣問:
「其實你有冇諗住生仔?」
吳卓羲乃家中長子,對這個問題確實感到壓力。
「我身邊好多同學朋友都已經結婚生仔,有些更有兩、三個,好多人都同我講有仔趁嫩生,容易溝通。但係我真係冇時間拍拖呀!最慘係我好難識女仔。」
吳卓羲直言自己樣子確實「花弗」,再加以前的一大籮緋聞,真的會讓不少女性卻步。
「好多人都話,睇我個樣已覺花心,絕對不會有女仔想主動識我。圈外人不明白娛樂圈運作,睇到緋聞就會懷疑。就算我有女朋友,建立一個家庭生兒育女都不是一朝一夕的事,我完全冇時間陪女友,更加沒時間經營一個家庭,o依家惟有專注事業,拼搏多幾年等緣份到吧!」
只是話猶未了,吳卓羲就已經先補定一句:「但我唔排除會閃婚兼閃電做老竇o架!希望可以在這兩、三年內啦!但係我一定唔會好似以前咁公開戀情喇!」
這一刻吳卓羲的表情,甚有「見過鬼仲唔怕黑」的感覺。
二○一一年吳卓羲前女友張馨予於其微博中,上載了她自己的自拍照,事件曾幾何時亦成為網上熱話。
十多年來緋聞不斷,與早前離婚的梁靖琪亦曾有過「過去」。不過吳卓羲說只當對方是妹妹,更在活動上大方合照。
福大命大
吳卓羲,也是一個福大命大的人。
事情發生在一九九五年,當時十六歲的他和四個朋友駕車從屯門出九龍,行經屯門公路時遇上極嚴重車禍,同車的兩男一女不幸離世,另一位女乘客住了幾個星期醫院,吳卓羲卻只是腳部輕傷。
「十八年前喇!我坐後排左邊,撞完車之後睇住隔籬個朋友斷氣,我仲不停叫佢唔好瞓,好記得佢個樣。」歷歷在目,事後一段時間甚至不時在夢中見到他們。
「我同自己講,係日有所思夜有所夢吧!過幾年之後就再冇夢見了。」
巧合的是,這三位朋友雖然年紀不同,但都同樣屬馬,屬羊的吳卓羲就逃出鬼門關。
「我都係去殯儀館送別才知。所以我信命,亦信佛。入行前都曾經去算命,問過好唔好入無綫做舞蹈藝員。」
近年四處漂泊,更有三個泰國佛牌隨身。
「我每年都去泰國拜神還神,凡是出門都一定隨身帶佛牌,去酒店房更加會攞出嚟擺。」
三個佛牌分別是祈求健康平安、財運和避是非。做娛樂圈為甚麼不求桃花?點知吳卓羲即時耍手擰頭。「桃花就唔好喇!o依家單身都係求健康、平安同財運,最緊要避是非,我真係好易中(是非)o架!」
觀乎這次臭蝦哥事件,信矣!