我們的快樂時代 譚玉瑛
主持了兒童節目三十二年，陪伴着幾代香港人成長，譚玉瑛姐姐是屬於我們童年的。
所以，當無綫踢她出局的報道一出，彷彿在告訴大家「譚玉瑛姐姐年代」已告終，即時觸碰到大家的神經處，惹來全城向TVB噓聲四起，在社交網為她力挽狂瀾。
然而，作為當事人的她，卻比我們任何人還要冷靜和睇得開。「呢一日始終都會嚟o架，係幾時發生咋嘛，咁o依家發生咯，就咁囉！」
但對外界來說，畢竟是兒童節目的經典主持，冇功都有勞啊，就這樣離開不會覺得有點不明不白嗎？「人哋覺得你啱用，先會用你，唔會話請一個人請得耐，就要繼續請你o架嘛，所以呢個世界冇乜話抵唔抵嘅。不過呢，知道有咁多人戥我（唔抵）呢，我都幾開心嘅，好似即係話有好多人鍾意見到我咁，亦都證明我咁多年嚟都冇呃飯食！哈哈哈！
「三十二年，真係幾耐呀呵？其實我真係鍾意做兒童節目o架，如果唔係有調動，我八十歲都會繼續做落去，我冇諗過轉，都冇諗過退休。」
隨着三月三十一日的過去，她調往《東張西望》當主持後，「譚玉瑛姐姐」這個情意結，已變成了集體情懷，但至少我們曾經歷過那段快樂的時代，也算是一種幸福吧！
執包袱
五十歲的譚玉瑛說，二月底當聽到製作部非戲劇製作總監（綜藝科總監）余詠珊跟她提議，由兒童節目主持轉為顧問時，她只是有感：「（離開主持崗位）呢一日終於嚟到」。
「Sandy（余詠珊）第一次同我傾，只係用咗十幾分鐘，我就已經收到訊息，我『哦！』一聲，咁就和議咗，講完o架啦！然後我就開始諗，究竟顧問係要做啲乜嘢嘅呢？」
接受余詠珊所講「把兒童節目年輕化」的理由？「佢呢個講法，我好理解，所以我好接受。咁我個樣唔老啫，但唔係年輕呀嘛，咁佢哋想個節目年輕化，一擺我喺度，又真係年輕唔到o架喎。佢作為一個幕後製作人，係有權同有責任去發展一個節目係點，我哋做藝員係被動o架，佢覺得我唔再適合，咁我咪唔再適合囉，我唔會有異議，又唔會去追究。」
有為此感到不開心嗎？「咁又冇乜太大唔開心，只係喺第二次傾之前，我係有啲迷惘：『咁即係點呢？』所以嗰段時間，我係有啲冇心機，唔係點講嘢。不過既然件事都發生緊，咁我就要處理，所以我第一次傾完，知道咗係咁樣，我第二日就靜靜雞去locker度攞番晒啲嘢，因為我當時唔知自己將來係點，仲留低啲嘢喺度，好似唔知點咁。
「同埋我自己都冇同啲同事講，佢哋都係睇到報道先知，因為我唔想有『你唔捨得我、我唔捨得你』嗰啲情緒呀。」畢竟，這是她幹了三十二年的工作崗位。
三月三十日，譚玉瑛最後一天錄影《放學ICU》，一眾主持人齊齊為她開歡送會。
九萬元
八二年四月一日，她正式加入《430穿梭機》，夥拍張國強。「嗰陣時張國強哥哥係機長，我係副機長，另外仲有隻怪獸，叫做『CoCo』，係太空廢物嚟嘅。」
而自那天開始，她便成為了我們的「譚玉瑛姐姐」。「做咁多年，我諗番起，其實過咗好多過程，而且仲係開心嘅多。當然都試過有唔如意嘅事，但我又冇諗過放棄喎。好似嗰陣仲喺廣播道，有次book我八點，我八點半先到，就畀導演用粗口鬧過我，我都好唔開心o架，但嗰次我真係做錯咗嘢嘛，所以我之後都唔可以畀自己做錯嘢。」
日子有功，她被台前幕後形容為「roll機OK」，亦因此令她於八五年被安排到英國出差。「去英國呢件事真係幾深刻！嗰陣節目同英國航空公司合辦一個活動，啲小朋友贏咗就可以去英國室內模擬駕駛。我同周星馳就喺香港負責呢個遊戲，但去英國，冇咁多位，所以只係得我去。
「我仲好記得有次喺化妝間，劉嘉玲嗰陣啱啱出道，佢坐喺我隔籬，好羡慕咁話：『你就好啦！去英國！』，因為嗰陣公司都冇乜節目會出trip。」
大概正是因為她「roll機OK」，所以外傳她是全TVB人工最高的藝員，而在早前有關她約滿的報道，也指她七千元一個騷價，因為出名爆騷，最高月入可達九萬！「哈哈哈！漏咗個『想』字呀！我諗呢樣嘢，一定唔會係公司嘅人討論，因為公司嘅人會知道公司會畀一個藝員幾多錢o架嘛！哈哈哈！」
唔好忙
曾聽說在TVB做兒童節目是筍job，因為要就小朋友的上學時間，所以每星期只需在周六和周日錄影，其他日子則可以做自己的事，搵其他外快。「以前都有好多外景o架，喺九七年之後，星期一至五先冇咁忙，咁我就過我自己嘅生活，去學吓嘢，夏天去曬吓太陽呀咁囉，我都好enjoyo架！」咁即是筍job啦。「以前啲人入兒童節目，就等於你搵唔到錢、唔會紅，好似個標籤咁，所以啲人入嚟通常四年左右，就會想離開；我諗係後來世界艱難咗，啲人覺得真係好難出booking搵咁多騷，先發覺兒童節目比較穩定，先開始恨做啫。」
既然一星期有五日空檔，照理也可以多賺外快吧！「我入行以嚟，都冇乜話想賺多啲錢嘅諗法，可能我唔孝順呀，啲人成日都話想賺多啲錢，買層樓畀阿媽，但我真係冇咁諗過喎。有時候啲人都會搵我做出面嘢，但我就會諗：咁咪會搞到自己好忙囉？我又冇想賺多啲錢嘅動機，咁我就會拒絕。
「唔好忙，反而係我嘅終極目標！哈哈哈！」
譚玉瑛自八十年代開始與男友居於愉景灣，一直生活得很有規律，也習慣朝七晚十一早起早睡，故此多年來，拍劇並非她那杯茶，因為要捱夜。「我都有興趣做吓其他嘢嘅，我係抗拒捱夜啫，哈哈哈！所以之前傾約，我考慮嘅係：死啦，如果要book我拍劇，我第一件事要搬屋先喎，咁如果我唔拍，我會唔會曠工呢？哈哈哈！然後又要捱夜，我唔得o架噃！哈哈哈！其實我鍾意做戲o架，但我衡量完之後，我寧願唔做！哈哈哈！」
一二年四月，TVB開記招慶祝她擔任兒童節目三十年。
食叉燒
她這種率性、簡單直接又樂天的性格，都是源於她有一個無憂無慮有叉燒食的童年。
她小時候，一家住在太古船塢的宿舍，即是現在的太古城。「因為我阿爺同爸爸都喺太古做，我阿爺做計糧嘅，我爸爸英文好叻，就喺運輸部做foreman，嗰陣我媽咪都有出去做嘢，所以我哋五兄弟姊妹，細個都係由阿嫲睇。」
她排行第三，上有一姊一兄，下有一妹一弟，「我同阿哥最friend，因為我成日都攞佢啲嘢玩。每次我哋有零用錢，我一係儲起佢，一係就買朱古力食，有時仲會放咗學走去買叉燒，『五蚊叉燒唔使切』係我口號嚟o架！跟住做做吓功課，我就會攞出嚟成嚿咬，啲兄弟姊妹喺晒度，我都唔會畀佢哋食，哈哈！因為呢個就係我嗰陣嘅snack！然後如果見到阿哥攞個電筒出嚟玩，我就會大嗌：『我又想要呀！』跟住阿嫲就會叫佢畀我o架啦！哈哈哈！
「我阿嫲雖然唔識字，但佢比較惡，係屋企嘅揸fit人。我爸爸話，細個考試攞第一，阿嫲聽到就打佢：『吓？考第一咁少！』哈哈哈！我覺得呢個好好笑！
「七九年我去考訓練班，我都唔敢話畀阿嫲知，因為佢知道就會話：『做乜嘢事幹要去嗰度做呢啲嘢？貪慕虛榮！』對佢嚟講，貪慕虛榮就係唔正當，所以後來我要家姐去做我監護人簽訓練班約、同阿嫲解釋，我先讀到咋！」
要是嫲嫲至今仍健在的話，相信也會為這個孫女成為了幾代香港人的「姐姐」主持感到驕傲吧！
那些年
今天離開「姐姐」的崗位，譚玉瑛坦言最捨不得的，是一眾台前幕後的同事。「喂，個個禮拜都會見，但阿媽都未必會個個禮拜見啦，吓嘩？哈哈哈！但我幾唔捨得都好，我個人其實幾無情o架，啲人問親我幾時farewell，我覺得唔需要囉，只要大家知道對方好就OK，唔好再喺嗰啲千絲萬縷嘅情緒度囉。」
口說無情的人，通常心裏都是相反的，要不然，她也會不記得他們的那些年。
「我前一排先見到張國強哥哥，嘩！佢啲仔女都好大個囉，佢個仔都大學畢業出嚟做嘢。對住佢，驚又唔會驚，不過，我哋大家可能都係比較靜嘅人，所以就算大家好耐冇見，再見番面，都係好以禮相待，恭恭敬敬咁囉！哈哈哈！」
「佢個人不嬲唔多講嘢，但都鍾意窒吓人咁，好多時都係（扮眼超超打量別人）『嘩喺？唔係呀嘛？』畀個眼神你睇吓，佢覺得你對鞋有幾肉酸！
「有啲人話星爺唔鍾意細路仔，其實佢只係用咗『冇當過佢哋係細路』嘅態度嚟對佢哋咁咋嘛，哈哈哈！」
「我以前覺得芷珊係壞女孩嚟o架！哈哈哈！因為佢搽啡色指甲油，夜晚又去disco，如果畀我阿嫲見到，一定話佢貪慕虛榮！哈哈哈！
「佢嗰陣最叻係乜嘢呢？係扮靚呀！佢住銅鑼灣嗰個年代呀，佢啲衫好似座山咁o架！我成日話：『你得一個身，點着得咁多衫呀？』
「Margie嗰陣都有小姐脾氣o架！好有添呀！哈哈哈！咁佢又真係好靚，喺屋企係最細，爹哋媽咪又好錫佢，所以佢係嗰啲嬌生慣養，大地在我腳下咁樣o架！哈哈！嗰陣我都聽到啲幕後講，有時畀booking佢呢，佢會好藐咁話：『哼！聽日又出？』哈哈哈！」
「伊健其實做咗好短日子，但佢做嗰陣就同緊芷珊拍拖。
「最記得有次我哋夜晚去配音房配旁白，佢哋兩個就喺防煙門出面，嗌交嗌到將隻表掟到爛晒，砰砰嘭嘭，咁我就走埋去，幫佢哋執番嗰啲一嚿二嚿，執完出嚟，就擺番低，等佢哋兩個之後處理。呢件事好激o架！簡直叫激情呀！哈哈哈！」
譚玉瑛妹妹
譚玉瑛中五畢業於文理中學。「（會考）淨係及格，但及格係讀唔到form 6。」七十年代，女生投身社會，只有秘書或工廠妹兩條出路。「但我就係唔想做秘書，我鍾意出去outdoor嘅工種。
「我諗嘢好簡單，個人又好好奇，畢咗業，要搵嘢做呀？呀，等我去報明愛讀建築（即建造業課程），睇吓啲樓點起先。」可惜因她只得九十磅，被職員勸她報讀秘書課程。
兜兜轉轉七九年入讀了第九期藝員訓練班，也不是因為想做明星、賺大錢。「我好鍾意學嘢，咁呢度都好多嘢學呀，學儀態，乜嘢叫做儀態呢？同埋so far只係得呢度收我。」
讀訓練班時期的譚玉瑛，只有十六歲，一臉眉清目秀。
八○年十月畢業，簽了約拍劇，「我好記得第一次出糧，有千三蚊。嗰個年代其實好少，但對於我就好多，我第一個反應係：嘩！咁多錢！點使呀？」做過《荳芽夢》裏翁靜晶的同學，又在《佛山贊先生》當過歐陽佩珊的妹仔，跟出跟入。「我到o依家見到郭鋒（歐陽佩珊丈夫）都會話：『幫我問候小姐呀！』哈哈哈！」
原來，我們的「譚玉瑛姐姐」，對於某些人來說，卻永遠都是「譚玉瑛妹妹」。
畢業後，還未成為「譚玉瑛姐姐」前，她（後排右二）曾在《荳芽夢》演翁靜晶（前排右二）的同學。
