何家勁為善最樂
何家勁（勁哥）近年轉營從商，喺惠州做健康五穀食品生意嘅佢，講到明將來盤生意大賺一定會起學校、做多啲善事回饋社會，勁哥嘅俠義心腸認真抵讚！
做咗惠州市政協委員多年嘅勁哥，佢間公司雖然剛剛起步，但係佢已經頻頻做善事。日前，勁哥就專誠同公司合夥人、南旋集團嘅老闆王庭聰，一齊去沙田探望一班老人家。
當日東姑見到勁哥出錢又出力，除咗喺惠州拎咗啲健康食品過嚟派畀啲老人家之外，佢仲唱番兩嘴等啲老人家開心吓。成班公公、婆婆見到勁哥真人靚仔又有型，都忍唔住爭住合照。話時話勁哥今年都五十有四，但係活力依然，外形似足三十五左右，唔通係因為有善心所以年輕啲？
何家勁與南旋集團嘅老闆王庭聰（圓圖），出錢又出力，更即場派利是，令到班長者開心到合唔埋嘴。
何家勁當日除咗上台唱歌助興之餘，仲做埋司儀帶領班長者玩遊戲。
