DaDa傳被追80萬
陳靜(DaDa)突然話唔撈就唔撈,遊澳洲散心返嚟仲係繼續冇影,聽聞激到經理人施念慈(Celia)生蝦咁跳,東姑收到風,話佢已經出信向DaDa展開法律行動,追究損失!
自從DaDa攞咗金像獎最佳女配角之後,人氣急升,Celia一心諗住幫佢發圍,一口氣接咗五部戲,全部收晒訂金,而每部戲嘅片酬就係十六萬。你冇睇錯,雖然講到DaDa紅到發紫,但片酬都只係得十六萬啫,換言之五部戲合共八十萬。據聞,仲未計啲廣告、品牌宣傳活動等,Celia會第一時間叫DaDa賠償番電影呢一筆先!
Celia以前同DaDa關係密切,但係自從DaDa玩失蹤之後,今時唔同往日,Celia仲話要告上法庭,追究損失。
不過,Celia出到法律招,DaDa都有計仔見招拆招,私底下仲同人講,自己有本事一個崩都唔使賠喎。事緣DaDa有情緒病呢單嘢,一早有同經理人講,佢睇緊嘅精神科醫生仲正正係Celia介紹嘅添。之但係,有得睇醫生,DaDa竟然冇得食藥,皆因當初係Celia落「暗令」,話驚啲藥有副作用影響工作狀態,叫DaDa千祈咪食添!
最終,DaDa就係落得壓力爆煲,情緒失控到要退隱咁嘅下場,佢就係捉住呢個point準備拎上庭做抗辯理由,到時要賠定唔使賠?真係要個官判過至知!